MLA inthlanah chhunzawm loh ni se

Aizawl Municipal Cor­poration (AMC) inthlan chu tluang takin zawh a ni ta a, Aizawl khawpui enkawltu tur councillor thlan tlinte chu February 18-a vote chhiar zawhah a hriat theih ang. Tun ṭum AMC inthlanah hian kum 2018 MLA inthlan aiin Aizawl khawpuiah banner leh flag intar a tam zawk a, political party chaw ei khawm leh candidate-ten thiam taka chhuanlam hrang hrang hmanga ṭhalai pun khawmna an siamsak a tam zawk niin a lang. 

Mizoram People Forum (MPF) a awm hnuah Mizoram khaw tam takah chuan MLA leh Lok Sabha MP inthlanah hial pawh party flag intar awm mang lo, banner leh poster pawh tar mang loin, tluang takin inthlan kalpui theih a ni tawh. Aizawl khawpuiah ngei pawh hian kum 2018 MLA inthlan leh kum 2019 MP inthlante kha tluang takin, a langsar a senso hautak lo zawnga kalpui theih a ni. 

Tun ṭum AMC inthlang erawh tun hmaa political party flag intar tam siak kha an ang leh hial tawh a, banner leh poster an uar hle bawk. Candidate ṭhenkhatin ṭhalaite picnic an huaihawt a, vote hmuh beiseina avang liau liauin ṭhalaite inkhelh an buatsaih a, ṭhianho len chhuaha intihhlimna tur siamsaktu pawh an awm nual niin a lang - chin chhunzawm loh atan a ṭha hle.

Kum 2018 MLA inthlanah khan mi ṭhenkhat chu mamawh zualpui atana sum sen bâk sen belh nei mang loin an tling thei a, Aizawl khawpuia bial ṭhenkhatah phei chuan poster, flag leh banner lama intihsiak pawh awm loin MPF lamin ṭha takin an veng thei. 

Tun ṭum AMC inthlana thil kalpui dan hi Serchhip biala by-election lo awm tur leh kum 2023 MLA inthlanah chuan chin chhun­zawm loh ni se, ṭul loa insen belhna siam hian nghawng ṭha lo a neih theih avangin MPF lam pawhin ṭan la thar deuh se a lawmawm hle ang.