Remna Ni

June 30 hi Remna Ni a ni a, MNF leh India sorkarin kum 1986-a remna an ziah champhaphak a ni. Kumin Remna Ni hi Mizo Zirlai Pawl (MZP) buatsaihin Lammualah lawm a ni tawh a, Mizoram sorkar buatsaihin vawiin lamah lawm a ni leh ang. 

Remna Ni hi Mizote tana ni chhinchhiahtlak leh lawmawm a ni a, kum 1986-a remna ziah a nih zana Mizoram boruak ang kha engtikah mah a awm leh thei tawh pawhin a rinawm lo. Kum 20 chhung zet ram buai avangin Mizote'n harsatna hrang hrang kan tawk a, mipui nawlpui pawh zuah loa harsatna a thlen hnuah kum 1986-ah remna a lo thleng ta a nih kha. 

Remna siam a ngaih chhan te, chumi phena inhnialna leh ṭan chhan inang lo hrang hrang te, politics-a thil kan thlir dan hrang hrangte awm bawk mah se, he remna lo thleng hi kan zavaiin kan lawmin kan ngaihlu thiam tur a ni. Thil kal tawh sawi chhuaka indemna leh mahni lam insawi lenna dah ṭha ila, inrem lohna avanga kan tawrhna hre rengin remna avanga kan dinhmun lo ṭha chho ta avangin lawm ila, he remna hi Mizo zawng zawng tan a ni tih hi i sawi uar deuh deuh ang u. 

Tlemlai deuh khan Remna Ni hi inrem lohna ni ang maiin kan chhuah a, midang sawi nêpa mahni lam insawi lenna remchangah kan hmang a ang ber. Political party lamin an party thawh­hlawkzia sawina atan an hman rualin a lehlam demna hunah an hmang tel bawk a, Remna Ni khan inrem lohna boruak a hring chhuak lek lek fo mai. 

Tun aṭang chuan Remna Ni hi Mizo zawng zawng ta a ni tih hi pawm thar ila, he ni hi mahni insawi ṭhatna leh midang sawi chhiatna hunah hmang tawh lo ila, Mizote hian Remna Ni hlutzia hi kan hriat belh zel thei ngei ang.