Aizawl khawpui enkawltu tur

Aizawl Municipal Cor­poration inthlana vote thlak chu tluang taka neih a ni a, khawi hmunah mah harsatna lian tham a thleng lo. Vawiin hian AMC vote hi chhiar a ni dawn a, kum nga chhunga Aizawl khawpui enkawltu tur thlan chhuah an ni dawn.

Municipal corporation hi kan hmelhriat ṭan dan a fuh tawk lo deuh niin a lang a, Mizorama sorkarna vawnfung chelhtu lamin municipal corporation-te thu­neihna sang zawk pek hi hreh tak tein an hreh bawk niin a lang tel a, hei vang hian state dang khawpui liana municipal corporation-te chu kan la phak lo hle tih phat rual a ni lo.  

Hei vang te pawh hi a ni a, AMC kal tawh dan en hian khawpui tana hmasawnna ruhrel lian din tura in ngaihna an nei lo emaw tih mai a awl a, an pawisa hman zawh tawh zat chhutin AMC-in hnuhma a hnutchhiah hi a ropui tawk lo hle. Zêp thu a chêng lo, AMC inthlan dawna AMC sum hman dan an han lipse tak tak khan kan khawpui ber hmasawnna tura sum awmte hi an duhsak zawngte leh a remchang dangah tlem te tein coucillor-te'n an sem rual a ang deuh a, a pawi hle a ni. 

Tunah chuan AMC thar a ding dawn ta a, he inthlan­ah hian eng party pawh thlan chhuah niin sorkarna siam se, tun hmaa AMC ang mai mai neih hi Aizawl mipuiin an duh tawh lo ang. AMC-a pawisa awm zat leh a hman danah mipui thikthu a chhe tawh dawn a, khawpui enkawlna tura sum awmte hi khawpui enkawlna atan dik taka hman ni se, AMC coun­cillor-te pawh hi thil dang atan ni lo khawpui enkawltu atana thlan an ni e.