Ramri chinfel dan thuruk

Assembly Budget Session neih mekah Home minister chuan Congress Legislature Party (CLP) leader  zawhna chhangin, chief minister-in 'Ramri chinfel dan tur (strategy) felfai tak ka nei' a tih chu mipui hriatah puanzar a la rem tih loh thu House a hrilh a, "A hma latu turte erawh chu a ṭul anga hriattir zel an ni," a ti. 

Mizoramin Assam nen ramri buai a nei a, Mizo mipuite tán vawi tam tak harsatna a thlen tawh. Kan ram chhung ngeiah Assam lamin kua an rawn hreuh zel a, Council of Minister ṭhukhawm ngeiin a pawm ramri chhungah pawh Assam sorkar kutthlakna tam tak a awm a Assam state mi leh sate chengin Assam lamah vek vote an nei a, a ruh langa sawi chuan kan ram min chhuh ṭhen nasa tawh hle a ni. 

Hetiang boruak karah hian kan state hotupa ber kan chief minister chuan vanneihthlak takin ramri chinfel dan thuruk a hriat thu a sawi. State hotupa ber sawi a ni a, a thil hriat lah hi Mizoram mipuite ngaihven zawng tak a ni bawk nen, mipui pawhin hriat chian an chak a, Assembly House lama zawh a ni pawh hi a mak hran lo. 

Chutihlaiin Home minister chuan he thuruk hi puanzar a la hun loh thu leh, a hre turte chu hrilh an nih thu a sawi zui a, hei hi thil lawmawm tak a ni. Kan chief minister thu hriat hi a la hlawhtling ngei ang tih pawh a beiseiawm a, a hmalatu tur lam hriattir an nih zel bawk avangin kan ramri buai hi chinfel thuai a nih i beisei tlat ang u.