Lirthei lei dan thar

Mizoram Transport Workers' Association (MTWA) general assembly hmanpuitu Transport minister chuan, traffic jam tihziaawmna atan motor lei dan scheme thar duan ṭula a hriat thu a sawi a, “Motor lei dan scheme thar duan chhuah a ṭul a ni," a ti.

Mizoramah hian lirthei lei theih dan hi mumal taka siam a ni lo a, hei hi kan buai chhan lian tak a ni. Tunah hi chuan pawisa nei apiangin an lei thei a ni deuh ber a, hei hi kalphung fel tak a ni lo.

Tlemlai deuh khan Aizawl khawpuia lirthei lei turin garage an neih a ngaih thu chhuah a ni a, tunah hian a taka kenkawh ṭhat a ni lo. Hetiang ruahmanna ṭha takte pawh hi a taka kalpui a nih leh si loh chuan awmze nei lo mai a ni ṭhin a, a taka bawhzui theih a ṭul a ni. 

Khawpuia traffic jam nasa hian nunphung a tibuai a, sum leh hun tam tak ṭul lovah kan khawhral bawk. India ram state capital zingah Aizawl hi lirthei speed a muanna ber a ni hial mai thei a, hei hian kan hnahthawh hun chhung thlengin a nghawng a. Traffic jam-a kan tân chhunga kan hun paih hi a uiawm ṭhin hle a ni. 

Lirthei lei dan thar siam thuai hi thil ṭul tak a ni tawh a, lirthei pung chak lutuk tur hi awmze neia inven deuh loh chuan kan buaina hi belchhhahin a awm zel dawn a nih hmel.