Sorkar versus politician

Aizawl district Magistrate (DC) chuan thupek chhuahin Aizawl hmun ṭhenkhata kea kalnaa thil zuarte chu insaseng turin a ti a; nimahsela politician pakhatin minister leh Aizawl Municipal Corporation lama inzuarte chhan zawnga a sawipui avangin DC lamin thupek an kengkawh thei lo a, an inzuar chhunzawm zel. 

Aizawl khawpui hi a tir aṭangin mumal taka duan a ni lo a, lirthei kalna tur kawngpui te, kea kalna tur bik te, inzawrhna tur leh bazar te, thil mamawh tam tak hi ṭha taka siam fel a ni lo. Khawpui a ṭhang zel a, tun hnaiah zawi zawiin thil a kal mumal chho ṭan a, dan leh thupek kengkawhtu lam leh khawpui enkawltu (AMC) lam pawhin awmze neiin hna an thawk chho ṭan. 

Hetihlai hian kawngpui kama lirthei hûn phal lohna hmuna lirthei hung tlat te, kea kalna tura lirthei riah hial ṭhin te, thil zawrhna remchanga kawngpui sir leh kea kalna tur lo hmang remchang tawkte an ṭhin. Hengte hian an ‘mamawhna’ vangin heng hmunhmate hi an hmang ṭhin a, an mamawhna zawna thlir chuan thil âwm tak ni mah se, dan mit aṭanga thlir chuan dan bawhchhetu an ni. 

Miin a mamawhna (sum lama harsatna pawh a ni thei ang) chhuanlamin a duhna hmun apiangah thil zawrh tum ta mai se, Aizawl khawpui hi enkawltu awm lo ang mai a ni dawn. Inzawrhna tur hmun a awm a, inzawrh phal lohna hmun a awm bawk a, chutianga inzuarte chu sum lama harsatna vangte pawh ni tel bawk mah se, dan anga thil kalpui a nih loh chuan mimal ‘harsatna’ ṭheuh chhuanlamin Aizawl khawpui kawngpui lunlai zawng hi inzawrhna hmunah a chhuak palh thei. 

Tun hnaia DC thuchhuah pawh hi mipui leh khawpui ṭhatna tura tih a ni a, thuneitu lama lo zualko pui a, inzawrh phal lohna hmuna an inzawrh zel phalsak tura ngen hi thil fing ber a nih hmel lo. Politician nih a, ruling party-a mi nih vanga inrawlh lohna tura inrawlh a awm thei a; sorkar rorel hi political party mi leh saten an thunun chuan ram kalphung atan a ṭha ber lo ang.