Hlawhtlinpui ngei turin mau

Mizoram chief minister chuan mau hmangin state dangte leh India mai ni lo khawvel entawn tur an  hnutchhiah tur thu a sawi a, mau hmanga India rama per capita income sang ber kan nih theih thu a sawi bawk.

Mizoram chief minister hian hun rei tak a lo buaipui leh tui chilh tawh mau hmanga intodelh hi thupuiah a la nei reng a, hetianga ngaihdan nghet tak a nei hi a fakawm hle. Mau hi eizawnna atan mai ni lo, hausakpui thama buaipui a tum tih a chiang a, vawi tam tak mau hmanga sum lakluh theih a nih thu hi a sawi ta.

Tun hnaiah pawh a thusawina tam takah mau aṭanga sum lakluh theih dan hi mipui hriatah a sawi tawh a, tun hmaa chief minister a nih hmasaka mau hmanga intodelhna a thlen lo kha ‘political failure’ lam ni loin scientist lam zawk thiam loh niin ‘scientific failure’ a nih thu a sawi. 

Kan chief minister sawi hmang hian MNF-in sorkarna an chan hmasaka mau hmanga kan intodelh loh chhan kha amah leh a thawhpuite lam thiam loh a ni lo a, scientist lam thiamna zawkin a la tlin loh vang a ni. Tunah chuan kan chief minister duh dan ang taka ‘tissue culture’ hmanga mau lian siam thiam an awm ta a; ‘political will’ chu a awm chiang sa a, scientist lamin an thiam tawh bawk avangin mau hmanga sum ṭhahnem tak lakluha intodelh hi kan ram hmabak ni maiin a lang ta a, thil phurawm leh lawmawm tak a ni. 

Chief minister berin a buaipui leh a ṭha zawnga a âtchilh mau hi he state hian a hlawhtlinpui loh palh chuan sorkar tan pawh mualphona a ni thei. Tunah hi chuan CM ni lo, minister dangte hian mau hi an la sawi chhuak ve meuh lo niin a lang a, an zavaia inthurualin hlawhtlinpui ngei turin mau hi atchilh se. CM-in a sawi ang hian mau hmanga khawvel entawn tur hnutchhiah a, India-a per capita income sang ber nih hlan hi a nghahhlelhawm hle a ni.