Kawng laih vil zui

YMA Sub Headquarters, Lunglei leh Sertlangpui Group hruaitute chuan tun hnai khan PMGSY hnuaia Ṭhuampui leh Lungchem inkara kawng laih mek an enfiah a, contractor hna thawh ṭhenkhat a felhlel deuh niin an hria a, tun aia chak zawka hmalak an duh thu an sawi a, "Kawng hi a nih dan tur dik taka siam a nih theih nan sorkar lam pawh vil zui turin kan ngen a ni," an ti.

Central YMA-in Mizorama kawng­pui siamte a tlo zawk theihna tur leh sum awm sa mila siam a nih theihna tura hmalak an rel a, an zin chhuah­naa an thil hmuh chu 'a lungchhiatthlak' tih a ni a, contractor hming hawha hnathawk an awm nual thu an sawi. Central YMA-in 'contractor hming hawh' an tihte kha tute nge an nih a, eng tin nge an bawhzui a, thuneitu sorkar lam hian an bawhzui dawn nge an hre lo der hlen dawn, tih hi zawhna lian tak a ni ngei ang. 

Kan rama hmasawnna tura sum lo lut hi a tlem hranpa lo a, a nihna turah tak hman ni thei se chu kan ram tan hmasawnpui tham a awm; amaherawhchu sum lo lut hi a hman­na a dik loh fo avang leh, a hmang dik lotute sorkar lamin an hrem zui ṭhin loh avang hian dik lo taka hnathawh hi hlauh­awmin a lang lo. 

Tun hnaia siam Ṭhuam­pui leh Lung­­chem inkar kawng­puite pawh hi eng ang chiaha 'felhlel' nge a nih hriat a chakawm a, YMA hian endik hna an ṭan ta sa sa a tawp thlengin vil zui thei se. Felhlel hi a fel ngei theihna turin theihtawp chhuah se, chu chu sorkar tihmualpho tumna lam ni loin Mizoram tan a ni ang.