Blood processing fee

ZPM chuan thuchhuah siamin, MNF kaihhruai Mizoram sorkar chu blood processing fee chungchanga mipui bumah an puh a; blood processing fee chu private hospital aṭangin an la la reng niin an tarlang. 

State Blood Transfusion Council chuan kum 2014 khan sum indaihlohna avangin blood pro­cessing fee a la ṭan a, thisen unit khat sawngbawlna manah Rs 550 zel an la. Sorkar thar a lo piang a, Council of Minister thil tih hmasak ber zinga mi chu thisen sawngbawlna man tihtawp a ni. Hei hi Health minister ngei pawhin chhuang takin a sawi a, mi­retheite hmakhua ngaia thisen unit khata a sawngbawlna man Rs 550 an lak ṭhin chu an tihtawp thu a sawi. 

Sorkar hian ‘sorkar hospital-ah chauh kan titawp dawn’ tiin thuchhuah an siam hran lo a ni mai thei a, tunah hi chuan sorkar damdawi-inah chiah thisen sawngbawlna man hi an la lo a, private hospital lamah an la chhunzawm zel tho a ni. 

Hei hi politics lam aṭanga thlirtute chuan ‘mipui bumna’ angin an hmu a nih pawhin a nih theih dan a awm a, sorkarin a puanzar duh dan leh Health minister pawhin a sawi chhuah danah kha chuan thisen sawngbawlna man hi tihtawp vek a ni ta mai emaw tih tur a ni a; nimahsela mirethei tam tak awmna private hospital-ah chuan thisen sawngbawlna man hi an la chawi chhunzawm zel a ni. 

Engpawhnise sorkar thara Council of Minister ṭhu­khawm hmasa berin a rel a ni bawk a, thisen sawngbawlna man hi sorkar hian damdawi-in zawng zawngah thisen sawngbawl man hi a thlawnin kalpui thei se. Tun dinhmunah hi chuan sorkarin a hmingṭhat an chang a, an chhâwk tum miretheite’n an awmna damdawi-in azirin an la chawi chhunzawm zel a nih hi!