CAB-ah kan ṭangrual e

BJP, Mizoram Pradesh president chuan, The Citi­zenship (Amendment) Bill, 2016 (CAB) chu an duh lo tih sawiin, Parliament-ah pass a nih loh nana ṭawngṭai turin kohhrante an ngen a; a ṭul a nih chuan BJP aṭanga bân an hreh loh thu a sawi. 

CAB hi Mizoram mai ni lo India hmar­chhak state hrang hrangten an duh loh thu an sawi tawh. CAB pass tumtu chu BJP (NDA) an ni a, Home minister-in Lok Sabha-ah a put lut tawh a, an pass tawh a ni. Rajya Sabha lamah sawiho tur zingah tel rih lo mah se, Parliament joint session-ah CAB hi sawiho a nih rin a ni a, chuti a nih chuan Mizote duh loh em em CAB hi pass a ni tho mai thei a ni. 

Engpawhnise Mizorama political party-te chu CAB chungchangah hian ‘a thu chuan’ an ṭangho vek niin a lang. Eptu lamin an duh loh thu na takin an sawi tawh a, ZPM leh Congress-in an duh loh thu an sawi piah lamah a pu luttu BJP (NDA) an dem thu vawi tam an sawi chhuak tawh.

Sorkarna vawn fung chelhtu MNF pawhin CAB hi an duh lo a, CAB dodalna total bandh pawh an thlawp a, CAB hi an pass a nih chuan ‘a ṭul chuan’ NDA 

aṭanga inhnuhdawh thlang an inhuam tih an president-in a sawi tawh. Tunah Mizoram BJP president ber pawhin ‘a ṭul a nih chuan’ BJP aṭanga bân an hreh loh thu a sawi. 

CAB kan duh lo ṭheuh a, a pass tumtu pawh hi kan duh lo tel tur a nih hmel. CAB hi amaha lo awm mai a ni lo a, tute’n emaw an siam chawp, Parliament in hniha pass tuma an beih mek a ni. CAB hi kan duh lo tak tak a nih chuan a pass tumtu lam hi kan duh lo tel ngam tur a ni a, ‘a ṭul chuan’ tih kha tun hi a ṭul hun chu a ni ta ta mai lo maw?