Thlawhtheihna avanga buaina

Tun hnaiah Mizoram aṭanga MP kan neih pahnih, Rajya Sabha leh Lok Sabha MP-te chuan thuneitu sâng zawkte hriat turin Mizoramin thlawhtheihna service kan neih tlem tak avanga kan harsatna tawhte an sawi chhuak. Rajya Sabha MP-in Parliament (Rajya Sabha) session zero hour-ah a sawi a, Lok Sabha MP-in Union Civil Aviation minister Hardeep S Puri hmuin theihtawp chhuahpui turin a ngen bawk a ni. 

Mizoramin thlawhtheihna ṭum hmun nei mah ila, Jet Airways-in thlawh­theihna an tihtawp hnuah nasa takin harsatna kan tawk chho mek. Damlo mangangte leh hna pawimawh leh ṭul bika hun chep tak kara zin turte tan ticket chan a harsa em em a, a awm chhun a to bakah ticket hmuh tur hi a dawn hnaiah chuan a awm tawh lo a ni ber mai. 

Thlawhtheihnaa chuang tur mihring kan nei a, a ṭumhmun kan nei chunga thlawhtheihna service an tipung thei lo leh a chuan man a to fal hi hriatthiam a harsa hle. Kan Chief Minister zahawm takin thlawhtheihna ticket to chhan a sawi ṭhin chu a ṭum hmun ṭhat loh vanga thlawhtheihnain a phurh tur zat a phurh loh vang a ni a, chutihlaiin tun hnaiah thlawhtheihna lut leh chhuak hi a seat an chuang khat (full) deuh zel bawk si a - Air India thuneitute be pawpa thil awm dan sawipui thei hi kan hruaitu zingah awm se a ṭha ngawt mai. 

Engpawhnise tunah chuan kan state sorkar hotute bakah kan MP pahnihten thuneitu sang zawk hriat turin thlawhtheihna service a tlem vanga kan harsatna tawhte an au chhuahpui tawh a; keini lam aṭang chuan theihtawp kan chhuah a, anni lamin an bawhzui dan hi India ram thuneitute leh Air India lam hian Mizoram hi min ngai pawimawh nge ngai pawimawh lo tih tehnate pawh a ni thei ang chu.