Aizawlah parking

Aizawl khawpuiah mimal ina motor dahna (parking) siamte sorkarin a puihna tur duan thar, Parking House Support Scheme (PAHOSS) chu tun hnai khan chief minister-in a tlangzarh. Chief Minister chuan, he scheme-ah hian financial year kal mek 2018-19 atan sorkarin cheng vbc. 10 (nuai 1,000) vel an dah phawt thu a sawi a, PAHOSS chu ama ngaihtuahna aṭanga chhuak a nih thu a sawi.

Aizawl khawpuiin harsatna lian tak a neih chu traffic jam nasa lutuk hi a ni a, hei hian mipui hun, tha leh sum tam tak a ei ral. Ṭul loah hun kan seng thlawn a, hna tam tak kan ṭhulh phah a, kan tih tur tam tak kan tih hman loh phah bawk nen, harsatna tam tak a thlen. 

Hetihlai hian traffic jam tihziaawm dan tur hi ngaihtuah ni tawh mah se tih tak taka buaipui a la ni mang lo a, tunah sorkar tharin hma a rawn la nghal chat a, a lawmawm hle. He ruahmanna thar hian Aizawl khawpuia parking lama harsatna tam tak hi a su kiang theiin a rinawm a, chu chuan traffic jam pawh a tihziaawm ngei a beiseiawm. 

Sorkarin sum a dah phal dan en hian ṭha taka tih an tum tih a chiang a, sorkar kum tharah hei aia tam zawk hi dah an la tum zui niin a lang a, danglamna thlen thei khawp ruahmanna lian niin a lang a, chief minister ngei pawhin chhuang takin, ‘Ka ngaihtuah chhuah,’ a ti ngat a, tih tak takin an bawhzui ngei ang.

Khawpuiin traffic jam avangin harsatna a tawk a, chumi su kiang tura hmalakna lian tham a awm hi a lawmawm a; khawpui pakhata parking siamna tura he ti zat an sengso ngam a nih chuan, thingtlang hmasawnna tur pawhin hei aia lian tham ruahmanna hi an neih zui ngei a beiseiawm.