Aizawl enkawltu turte

Aizawl Municipal Cor­poration (AMC) inthlan chu tluang taka neih zawh a ni ta a, ward 19 awmah MNF-in ward 11-ah hnehna an chang a, ZPM-in ward pangaah hnehna changin Congress-in hmun pahnihah hnehna an chang. 

Kum nga chhunga Aizawl khawpui enkawl hna chu thlan thar mi 19-te kutah a awm dawn a, a bikin sorkarna siamtu MNF-te kutah a awm deuh bik ang. Kan ram khawpui ber hmasawnna ruhrel din kawngah te, faina leh thiang­hlimna lam kawngah te, khawpui hmel­hmang a ṭha zawka thlak kawngahte leh, state dang khawpuite anga hmasawn ve thei tura dah kawngah AMC hruaitute hian mawh an phur sang dawn hle a ni. 

AMC term liam taa pawisa hman dan hrang hrangte an lipse hnu khan pawisa hmanna rinhlelhawm tak tak a awm thluah a, zin veivahna senso tam lutuk te, a hmanna chhui chat theih loh 'miscellaneous' tih hnuaia pawisa tam tham tak hmante leh, Aizawl mipuite puala pawisa tur thil dang holam taka hman angte kha an tihtawp ngei a ngai dawn a, mipui pawhin hei hi an ngaihven tawh hle ang. 

AMC ṭha leh lang­tlang din tura mipui tana thawk tak tak tura inpe an nihzia a takin tilang thei se, inthlan dawna mipui hmaa an inzawrh ang ngeiin an manifesto-te tihlawhtling ngei se; an kuta sum awmte an hman thiam phawt chuan Aizawl khawpui hi India rama khawpui langsar takah an chhuah theih ngei i beisei ang.