Committee thar 14 hi

Mizoram sorkar chuan tun hnai khan Committee chi hrang 14 a siam thar. Heng Committee-ahte hian chairman atan minis­ter-te leh vice chairman atan MLA-te leh MLA hluite dah an ni a, secretary atan sorkar department secretary-te ruat an ni thung. Committee nihphung tur leh an hnathawh dan tur (terms of reference)-te chungchangah chuan hriattirna la chhuah leh tur a ni. 

Mizoram sorkarin hnathawh a tum a, hna a thawh sawt zawkna turin Committee hrang hrang a din. Hei hi Mizorama kan la neih ngai loh a ni a, an din chhan ang ngeia hna an thawk thei a nih ngat chuan hmasawnna thlen thei tur an ni ang. 

Tun hma deuh aṭang tawha Mizorama thil kal fuh lo laklawh chu ‘MLA fang’ awm thiang lo ang maia nihna kan inthei sem vak ṭhin kha a ni. Danin minister awm thei zat chiang takin a bithliah a, minister ni ve ta lo ruling MLA-te tihlungawina tur leh, an tana remchang siam tum niawm takin MLA-te chelh tur post hrang hrangah siam a ni thluah ṭhin. 

Sorkar kal tawh hrang hrang kan thlir let chuan heng post siam belhte avanga sorkar leh ramin hma a sawn phahna lam sawi tur a tam lo. Hemi lehlamah chiah hian sorkar sum an ei hek a, ṭul loah lalna leh thuneihna (power) kan pek belh hmangin sorkarah remchanna an lei zel a, a tawpah sorkar sumin a tuar ta ṭhin a ni ber mai. 

Tuna Committee thar dinte hi an kalphung tur pawh puan a la ni lo a, an thuneihna chin pawh siam a la ni lo. Vice chairman-a ruatte hi sorkar lirtheite dawng a, driver leh hamṭhatnate nei veka an awm dawn a nih chuan sorkar sum chu a hek leh phawt dawn tihna a ni a; an sum tihhek khuh bo tur khawpa hna an thawh erawh chuan sawisel hlawh loin fak an hlawh zui thei ang. 

Engpawhnise sorkarin hna­thawh a tum a, hnathawktu tur a ruat a, an kalphung leh an hna­thawh dan hi mipuite hian ngun takin an thlir reng dawn a ni.