MPSC tel loa hna lak tum hi

School Education minister chuan, zirtirtu sang khat vel lâk a nih dawn thu leh MPSC kaltlang loin, contract leh muster roll-a lak phawt a, a hnua dah ngheh theih tura tih tum a nih thu a sawi.

Minister ṭawngkam takah chuan, "Zirtirtu sem rual tur pawhin a strength a tlem. Post ruak hnawh khah loh a tam. Zirtirtu hi sang khat dawn kan la thar dawn. MPSC-a kan pek chuan an buai a, department zawng zawngin hna lak tur kan pek khawm avangin an ti rang thei lo. A theih chin chinah contract leh muster roll-a lak kan tum phawt ang, performance based-a dah ngheh theih turin," a ti. A thusawi hi ṭha tluangtlang tak angin lang mah se, a phenah thil hlauhthawnawm tam tak a awm. 

Mizoram sorkar hnathawkte latu tur MPSC kan nei a, anni hi hna la hman lo khawpa an buai a nih chuan ṭhiah mai pawh a ṭha zawk ang. Anni pehhel tum niawm taka minister a ṭawng chhuak hi a vanduaithlak a, MPSC chu buai lutuk avanga zirtirtu hna la hman lo anga a chhuah hi a fuh lo a, hna latu kal tlang ngei hian zirtirtu hi lak ni rawh se. 

Mizoramah zirna a ṭhat hleih­theih loh chhan lian tak chu zirtirtu lak dan fel lo a ni. A tling leh thiamte aia hmelhriat nei leh duhsaktu neite lak an nih fo avangin kan zirnain a tuar a ni. Tunah sorkar thar a piang a, mipuiin beisei an neih san vanglai takin MPSC tel loa zirtirtu lak a, a hnua dah ngheh tumna awm hi zirna atan a pawi a, a tling zawkte paiha duhsakna lantirna remchang a nih avangin a pawi lehzual. 

Mizo ṭhalai hna zawng mekte tan he thil hi na taka do let ngei chi a ni. Zirlai pawlte tan pawh hei hi ngawih bopui chi a ni lo ang. Zirna kaihhnawihah chuan hei hi thil serious tawpkhawk a ni a, kan fate zirtirtu tur hi dan angin dik tak leh fel taka lak ni se, hna latu tura din MPSC kaltlang ngeia lak ni rawh se.