Mizoram sorkar hian CAB a vei em?

MZP chuan tun hnai khan thuthar thehdarhtute an kâwm a, Mizoram sorkar chu The Citizenship (Amendment) Bill, 2016 (CAB) vei tak tak loa an ngaih thu an puang. 

MZP-te sawi hmangin, Republic Day boycott tuma NGO Coordination Committee a in­buatsaih laiin chief minister-in President Rule-a dah a hlauh­thawn avangin boycott lo turin a ngen a, CAB chungchang chu sorkar kuta dah ngam turin a ngen bawk a nih hmel. MZP leh an thawhpuite hian sorkar hi an la ngaichang zel a, tun thlengin hmalakna mumal an la nei lo a ang hle. 

CAB hi political party tinin an duh lohzia an sawi tawh a, sorkarna vawn fung chelhtu MNF ngei pawhin an duh loh thu leh an dodal thu an sawi. MNF hian CAB hi an duh lo a ni tih hi rinhlelh tur a awm lo a, chutihlaia state ṭhenawm sorkarte an au chhuah hnu pawha ngawih an chuh rei lutuk hi chu a zia lo deuh. 

Tun hnaia MZP lamin Mizoram sorkar an duh khawp lohna hi sorkar lam hian party inbeihna a ni lo tih hre chiang se, political party dangte pawhin hamṭhatna zawnna hun a ni lo tih hre bawk se. CAB chungchanga innawrna hi ram leh hnam thil, nakin zel thlenga kan ram leh hnam awm dan tur nghawng thei thil a ni a, pheikhai rual taka ke pen hun a ni. 

Sorkar meuh a au chhuah chuan CAB nawr tlang tumtu central lama MNF thawhpui NDA lam pawhin an ngai pawimawh deuh ngeiin a rinawm a, tun thlenga Mizoram sorkarin thawm a la nei lo hi chu a ngaihṭhat thlak loh ṭan ta hle a ni.