Save Tuitun

Kawnpui, Mualvûm, Bualpui leh Thingdawl khaw mipuite an tui tlan ber Tuitun lui leh Chhimluang lui humhalh an duhzia tarlan nan tun hnai khan Save Tuitun March an buatsaih a, mipui ṭhahnem takin kawng an zawh. 

He kawngzawhah hian Tuitun leh Chhim­luang luite chu mipui tlan a nih avangin túr hmanga hrâi lo tur leh lui kam velah lirthei khalhtute'n bawlhhlawh paih lo se an duh thu an au chhuahpui a. Tuitun lui kama industry lian siam mek pawh lui tihbawlhhlawh an remtih dawn loh thu an hrilh a, an industry chhunga bawlhhlawh sâwngbawl dan fimkhur tur leh, her danglam ngai a awm chuan her danglam nghal turin an chah. 

Mipui intelkhawmin lui tui humhalh duhna an lantir hi thil lawmawm tak a ni a, hemi kawnga kan ṭhangharh zel hi hmasawnna duhawm tak a ni. Hun rei tak chhung kha kan ram chhunga thing leh maute duat nachang kan hre lo a, kan lui tuite kan humhalh ṭhat loh avangin kan tuar ta mek a ni. 

Mahni khaw rama lui tui ṭheuh humhalh nachang kan hriat a, chumi kawnga ke kan pen chhoh zel chuan kan ram hian hmabak êng tak a la nei a, tuna kan ṭhanharh kim loh erawh chuan kan tlai palh mai ang tih a hlauhawm ta hle. Lui tui humhalh tur hian kan zavaia thawhhona a ngai a, tute emaw chauhin an thawh chi a ni lo a, khawi lai ram bung khatin emaw an beih tur a ni lo. Mahni khaw ram ṭheuha thing leh maute duat a, kan lui tuite humhalh tura kan beih chuan ram nuam zawk kan la siam thei a, 'Save Tuitun' tia a committee hial dina an hmalakna hi a entawntlak hle a ni.