Vote tihchingpen a ni ṭhin em ni?

MNF president leh Mizoram cheif minister Zoramthanga chuan kum 1989 inthlanah vote tihchingpen a nih thu a sawi a, kum 2013-ah pawh Electronic Voting Machine chu tihchingpen (rigged) a nih thu tun hnaia Aizawl Municipal Corporation (AMC) inthlana MNF councillor tharte lawmna hunah a sawi bawk. 

Inthlana vote tih­chingpen thu hi titiah chuan sawi a awm ṭhin a, finfiahna erawh a awm lem lo a, politics-a inpuh tawnna mai maiah mi tam zawkin an ngai niin a lang. Khaw­lai titi lamah emaw, pa naran ve takin emaw heng thute hi an sawi a nih chuan ngaihven zui a hlawh hmel lo a; nimahsela state pakhat chief minister meuhin inthlana an party-in hnehna an chan lawmnaah inthlanna vote tihchingpen thu a sawi chhuak hian sawi zui a hlawh ngeiin a rinawm. 

Kum 2013 inthlan zawhah khan tuna kan chief minister ni ta hian EVM tihchingpen thu hi vawi tam tak a sawi a, tun hnuah pawh EVM tihchingpen thu a sawi hi hriat tur a awm ṭhin. Mi tam berin tihchingpen theiha an ngaih loh, vote thlakna tur bika siam khawl ṭha tak EVM tihchingpen avanga MNF chu tla ta leh Congress lam tling ta lam hawiin a sawi. Hei hi inthlana an chak loh hlima a sawi a ni tawh mai lo a, tun hnaia inthlana an chak zawh hlimah pawh kan chief minister hian a la sawi tho a ni.

Inthlanah chuan chak chang a awm a, chak loh chang pawh a awm ṭhin a, hei hi democracy ropuina tak pawh a ni a; nimahsela mahni pawl chak loh ṭuma a EVM lam zawk mawhpuh hlauh mai ṭhin hi chu thil danglam tak a ni. Kan chief minister sawi hi thudik a nih ngai chuan Mizoram inthlanah vote tihchingpen a ni tawh ngei niin a lang a, hei hi mipuiin an pawm ang nge pawm lo ang?