Kaihhruaina zawma lo hal

Fire Prevention Week 2019 puala thuchahah State Level Fire Prevention Committee chairman leh chief minister chuan kângmei a chhuah palh pawhin, neitu thinlung púa ṭhelh mit nghal zel tura ṭan lakpuiah mipui a sáwm a; "Tlang ram lo neih hi ram kâng tichhuak tamtu a ni ve thei a, mahse, lo vah leh hâl chungchanga sorkar thupekte kan zawm chuan nasa takin ram kâng a tlem phah thei a ni," a ti. 

Mizoram chuan tlang ram lo neih kan la kalpui miau avangin kum tinin lo kan hal lo thei lo a, ramngaw kan tihchereu bakah nungcha tam tak a kang ral a, a pawi hle a ni. Sorkar hrang hrang kan hrawn tawh a, tun thleng hian thingtlang mite lo neih dan leh eizawn dan thlak a, tlang ram lo neih bansan thei tur khawpa kaihruaitu kan la hmu lo a, kum tinin lo kan la hal chhunzawm zel lo thei lo a ni. 

Hetihlai hian lo kan hal danah sorkarin ruahmanna fel tak a nei a, a hal hun bi a tuk fel vek a ni. Hengte hi ṭha taka zawm vek ni thei se a ṭha hle a, hei hian kangmei chhuak tur tam tak a veng thei ang. Lo hal hun bituka hal zingah pawh inthlahdah vanga ram tikang an awm a nih chuan hremna lek­kawh ngam ni se; lo hal hun bituk pawn lama hal lui an awm a nih phei chuan sor­karin dan angin ngaih­tuah zui se a ṭha hle. 

Kan ram hruaituten tlang ram lo neih thlak­na tur an la hmu chhuak thei lo a, chuvangin lo hal kan la kalsan thei si lo a, sorkarin kaih­hruaina a siam ang takin lo hal ṭhin ni se, sorkar kaihhruaina zawm duh lote chungah khauh laka dan anga hremna kenkawh ni thei bawk se, kum hnih khat hnuah chuan sorkar kaihhruaina pawn lama lo hal hi a bo thei ngeiin a rinawm.