Citizenshep (Amendment) Bill

Rajya Sabha-a budget session tawp niah Citizenship (Amendment) Bill, 2016 (CAB) pharh a ni ta lo a, tiamchin awm loin session tihtawp a nih zui avangin CAB hi a thi (lapse) zui tura ngaih a ni. 

Lok Sabha lama pass a nih hnuah Rajya Sabha-ah a tlang a nih chuan Mizote leh India hmar chhak state dangte pawhin an duh loh em em CAB hi hman a ni tawh dawn a; Rajya Sabha lama an pharh hman ta lo hi thil lawmawm tak a ni. 

He dan hi hman ni ta se, Mizoram tana a hlauhawm dan tur chu kan hriat sa vek a ni. Hei vang tak hian political party zawng zawngin an duh loh thu an puang a, NGO lamin theihtawp chhuahin ṭan an la bawk. Mizorama kan duh lohna kan lantirte hi mi ṭhenkhat chuan sawngsawhlawt lo nia ngaiin ṭul lo an ti a ni mai thei a, hetianga mahni hmun ṭheuha kan phak ang tawka theihtawp chhuaha kan beihna rah hi kan seng a, NDA (BJP) lam pawhin Rajya Sabha-ah an pharh ngam ta lo niin a lang. 

Tunah rih chuan Lok Sabha dinglai hi a hun a tawp dawn tak avangin CAB hi chu a zuzi dawn ta niin a lang. Chutih rual chuan CAB hi a la nung thar leh thei a, chu chu Lok Sabha inthlan lo awm tura BJP leh an thawhpuite an thlin nawn lehin a ni. Tunah hian CAB chu a tlawlh dawn ta niin a lang a, kan lawm viau rual hian Lok Sabha inthlan result azirin eng tikah emaw CAB hi a lo piang nawn leh thei dawn niin a lang.