Zirtirtu sem rual versus lak belh

School Education department-in RTI Act hmanga zawhna an chhan danin kum 2017-ah khan Mizoram chhunga district pariatah sorkar middle school 570 a awm a, zirlai 29,885 leh zirtirtu 4,046 an awm. Zirtirtu pakhatin zirlai 7.39 zel enkawl ang an ni. 

Mizoram sorkar chuan zirtirtu lak belh tumin ruahmanna lian tak a siam a, vawi leh khatah a hlawmin zirtirtu 1,000 dawn lak a tum. Hei hi zirtirtu indaih loh phuhrukna tura tih a nih vangin hmanhmawh taka lak an tum a, MPSC pawh nghak thei lo leh a hmaa dan awm sa pawh tidanglamin zirtirtu hi an la thar dawn a ni.

Mizoram sorkar sikula zirtirtu awm dan en hi chuan ziritrtu indaihlohna hi buaipui tham a nih rualin zirtirtu indaih leh lutuk zawk hi buaipui tham a ni tel. Khawpui leh khawpui aṭanga lam hnai deuhahte chuan zirlai nena inphu lo khawpin zirtirtu an tam a, hei hi kan buaina pakhat zawk kan hmuh hmaih luih tlat chu niin a lang. 

Congress-in kum 10 ro an rel chhung khan zirtirtu hi an sem rual thei lo a ni ber a, hemi kawngah hian an hlawhchham a ni. Zirlai pawlte pawhin thawm na takin zirtirtu sem rual an sawi ri a, a tak a chang zo lo. Tunah pawh MNF-in sorkarna vawn fung an han chelh ve ta chiah a, sorkar pawisa sen belh ngai miah loin huaisen takin zirtirtu hi sem rual ngam se, zirtirtu hi heti zat zat lak belh a ngai hauh lo ang. 

Mizoram zirna kawnga mutan lian tak pakhat chu sorkarin a hnuaia hnathawkte a duhna leh mamawhna hmuna a dah thei lo/ ngam lo hi a ni. Hei hi MNF hian huaisen takin an chingfel dawn emaw tihlaiin chumi pumpelha zirtirtu lak belh lam bawk an buaipui leh nghal chat a, kan sorkar hrawn tawhte hian mamawhna hmuna sorkar sikul zirtirtu sem rual hi an ngam lo a ang ber.