Chhiatna leh a chhehvel

Durtlang Leitana Basic Service to Urban Poor (BSUP) building pali chimah mi pathumin nunna an chân a, hliam tuar eng emawzat an awm bawk. He chhiatna thleng hi a hmunah chief minister, minister leh sorkar mi pawimawhte'n an tlawh a ni. 

He vanduaina thlentu hi a kawm chhak lam hmun zau tak lei leh lung tawlh vang a ni a, chu chuan BSUP building hi na takin a deng a, heng inte hi a chhawng hnuai lam chhiain nunna hial an chân ta a ni. He hmun hi chhungkaw khawsak harsa zawkte awm khawmna tura sak a ni a, an chunga van­duaina a thleng zui hian lainat an hlawh­in a thlen dan hian sawi a hlawh hle. 

Zan thim hnua thil thleng a nih vangin a tirah eng ang taka nain nge lei leh lung tawlhin a den hi hriat a ni lo a, a in satu contractor leh a viltu lam demna a nasa hman hle. Khua a var a, leimin dan thlalak chiang zawka a lan hnu leh mi thil hre deuh zawkte titi (social media) vawrh darh aṭangin a nêktu a nat avangin chim âwm ve renga ngaihna pawh a lian zui leh hle. 

Hetiang thil a thlen hian mipui hian thil hre chiang mang loin kan ngaihdan kan au chhuahpui thuai a, ṭhenkhatin politics zawnga lo kai lutin dem tur kan zawng vat a, a tlawhtu lamah fak tur kan hmu thuai bawk ṭhin. Heng chhiatna thleng hi a vanduaite tawrhpui hunlai aṭanga politics rimnam inhnial­naa kan chantir ṭhin hi a pawi hle. 

He chhiatna hi sorkar hmun­hmaa thleng a ni a, nunna chân an awm bawk a, sorkarin chiang takin a chhui ngei tur a ni. A chhui chian hnu­ah a building sak dan kalhmang, a hmun­hma thlan fel dan leh thil dangah fel lo a awm a nih chuan a mawhphurtu pawh hrem ngei tur a ni ang a, a zuzi ral mai tur a ni tawh lo ang. 

Tun hmain buil­ding chim avanga chhiatna, lei chim avanga thihna hialte a thlen pawhin an chhui chian hnua a tawpna hi beisei loh lam a ni fo; he chhiatna thlengah hian mihring thiam loh leh mawhphurhna a awm a nih ngai chuan chhui chhuah a, dan anga hrem hi a ṭul a, engpawhnise mithiamten thil awm dan an chhui chian hmaa hmanhmawh taka ngaihdan siam erawh a fing ber lo ang.