Mizoram Youth Commission

Mizoram Youth Commission (MYC) chairman atana ruat chu a chairman nih theih chin a lo pelh tawh avangin chairman thar ruat a ni. MYC nodal department hi Labour, Emlpoyment, Skill Development & Entrepreneurship (LESDE) a ni ṭhin a, tunah chuan Sports & Youth Services department hnuaiah a awm tawh dawn. 

MYC hi din a nih theihna turin zirlai pawlin theihtawp chhuahin an nawr a, chumi hnuah sor­karin a din ta a ni. He commission hi a hming aṭang ringawt pawh hian a din chhan a chiang mai a, chutih rualin MYC din a nih hnuah ṭhalaite dinhmun chawikanna atan a thawk ṭha nge ṭha lo tih tehtu tur chu mipui kan ni ang.

Mizoram sorkar hian depart­ment hrang hrang a nei a, ṭha­laite hmakhua ngaiin Education department pahnih a neih bakah a hranpain Sports & Youth Ser­vices department a nei bawk. Hei mai hi a ni lo a, ṭhalaite eizawnna kawhhmuha enkawl zui turin LESDE department a nei hrang a, Planning & Programme Implementation lamin ṭhalaite eizawnna bulṭanna tur chak takin an kalpui mek bawk. 

Hemi piah lama MYC kan nei hi a lawmawm viau rualin hna an thawk ṭha lo a nih chuan pawisa sen thlawnna mai a chang ve thei. Mizoram sorkar department ṭhenkhatte pawh hi a loa kan awm theih niin a lang a, insawh muka inchhun fin zel hian sum inrenna remchang a nih bakah hna pawh a awlsamin a chak zawk thei. 

Engpawhnise MYC ṭha tak kan nei thei a nih chuan thil lawmawm a ni dawn a, mipui pawhin, "MYC hi a lo ṭangkai takzet a nih hi," an tih theihna tur khawpin hna thawk se, Mizo ṭhalaite tan theihtawp han chhuah teh se.