Grape chingtute

Mizoram sorkarin zu khapna dan kalpui thar leh tawh mah se, zu khapna danah winery ngaihhnathiam a nih theihna atana hmalak a nih thu Law & Judicial minister-in Champhai Grape Growers Society (CGGS) general body mee­ting-ah a sawi. 

Mizoram khaw chhak lamah grape a ṭha duh hle a, a hlawm lian thamin an ching a, grape tui sawr (wine) pawh a hralh a kal hman hle. Kum 2010-a Grape sâwrna hmun winery din a nih hnuah khawl hmangin wine ṭhahnem tak sawr chhuah a ni tawh a, an sawr tam ber kum 2015-ah grape quintal an 1,682 sâwr a ni. 

Grape chinga eizawngtute tana thil hlauhawm tak mai chu zu khapna dan hman a niha wine khap tel hi a ni a, wine hi khap zingah a tel a nih chuan an eizawnna a tawp a ni mai ang. Kuthnathawktute hmangai chunga grape chingtute tana hamṭhatna awm thei zawnga kalpui tumna awm hi a lawm­awm hle a ni. 

Tlemlai deuh khan Champhai district lama grape tui sawrte hi hralh a kal hman hle a, Aizawl khawpuiah pawh hmun hrang hrangah a hralhna bik dawr neiin sum pawh ṭhahnem tak an thawk chhuak. Chutihlaiin wine kan hmuh dan leh kan in dan kha zu pangngai anga ruih tuma in mi tam tak an awm a, phalna neia zu zawrh a nih chiah khan wine hralh hi a kal ta lo hle a nih kha. 

Tunah grape chingtute tan sorkarin hamṭhatna a siam leh dawn niin a lang a, hei hi grape chingtu lam pawhin an hlawkpuiin mi ṭhahnem zawkin an din chhuahpui ngei a beiseiawm.