Hnam dang chhawr

Kolasib DC chuan Mizoram leh Assam inrina Bairabi Zophai leilet neitute chu an leilet enkawltu atan Mizoram mi ngei chhawr turin a hriattir a; hetiang hmù zo lo state pawn mi chhawr turte chu an mi chhawrte ILP siamsak ngei tura a hriattir bakah an hnathawh chhung bâk Mizoram chhunga awm lo tura intiamkamna ziahtir vek turin hriattirna a chhuah. 

Mizoram leh Assam ramria buai­na chhuak ṭhin avangin he hriattirna hi chhuah ni mah se, ramri buai lohna hmunah pawh hei hi hman zel theih ni se a duhawm hle. Tuna Mizorama thil ngaimawhawm tak pakhat chu hnam dang cement mistiri-ten an duh ang anga rate an inchhiar to ṭhin leh daily-a chhawr hleih theih tawh loha an in siam leh ṭheka veka hna an zawng hi a ni a, tun ang zela kan kal chuan India rama in satu rawih man säng filawr ber kan ni thei hial ang. 

Heng thil hi sorkar hian a ngaimawh tur niawm tak a nih laiin a hre lo der emaw tih turin a ngawi hmiah a ni. Hetihlai hian Aizawla veng ṭhenkhat erawh chuan an huam chhunga hnathawh man an bituk thung. Hei hi tuna chinfel a nih loh chuan ṭheka-a hlawh ṭha taka thawk tawh Vai mistiri kan tihte hian daily-a hlawh la tura thawh hi an duh lo zual zel dâwn a, he thil chinfel dan hi ngun taka ngaihtuah a ngai. 

Hetihlai hian Mizo hnathawka kan chhawrte pawh hnam dang koh ngai lo khawpa inpe, hun vawng dik, taima leh thuawih theia an awm ve a hun tawh a, mi tam takin hlawh inzata chhawr tur a awma hnam dang an thlan zawk fo chhan chu an thuawih theihna leh an hun vawn dik vang te hi a ni ṭhin. Mizo hnathawktu ṭhenkhat hi chu a chhawrtute tan pawh duh dan sawi ve hleihtheih loh khawpa mahni thu duh te an awm ṭhin a, hnam dang hnathawk kan tihtawp dawn chuan a Mizo lam pawhin inzir tur kan la ngah hle. 

Engpawhnise Kolasib DC ruahmanna fing tak hian ramri leh ram chhungah pawh hna­thawk chhawr danah min bêng harh se, loh theih loh thilah lo chuan hnam dang chhawr loh hram hram tum hi kan state aṭanga pawisa luang chhuak tur kan dan theih dan remchang ṭha tak a ni ang.