Thil ṭha tih intihhmuh

Association for Voluntary Blood Donation (AVBD) leh an thawhpuite chuan, Valentine's Day pualin Mizoram district hrang hrangah Blood Donation Camp an huaihawt a, mi 888-in thisen an pe. 

February 14 hi khawvel pumah Valentine's Day tiin inhmangaihte ni a ni a, tun hma deuh aṭangin khawvel hmun dangah chuan kawng hrang hrangin an hmang. Mizoramin he ni kan buaipui ve ṭanna hi a la rei vak lo chungin tun hnaiah mi remhriate’n ṭang­kai taka an her rem hi a lawmawm hle. 

Zep thu a cheng lo a, mi ṭhen­khat chuan February 14 hi an hmang thiam lo a, ṭum danga an tih duh ngai loh sualna leh an inchhirna tur thil tih ni atan an hmang ṭhin a ni awm e. Hetianga ṭhangtharte’n ni bik an hman thiam loh ṭan mek laia thisen pek runpui huaihawt a ni ta hi a lawmawm a, a ṭangkai hle a ni tih thisen an pek zat aṭangin a lang. 

Thil reng reng hi kan duhzawng a nih loh avanga khap vek theih a ni lo a, heng ni bikte pawh hi intihhmuh thil a nih chhoh tawh avangin tihtawp leh khap beh theih chi a ni lo. 

Hei vang tak hian ṭangkai taka hman dan inzirtir a, thil ṭha tihna ni atana kan kai her hi a lawmawm a; Mizote hi thil ṭha tih tur kan inkawhhmuha kan inkaihhruai thiam phawt chuan kaihhruai theih kan ni tih a lang nawn leh a, thil ṭha tih hi i uar deuh deuh ang u.