Ruihhlo do tura theihtawp chhuah

Mizoram Excise & Nar­cotics Service Association inkhawmpuia tun hnaia thu­sawitu, Excise & Narcotics department (END) minister chuan, theihtawp chhuah a nih chuan ruihhlo laka hnehna an chan ngei tur thu a sawi. 

Mizoram hian ruihhlo do thu hi kan sawi chhuak fo tawh a, tuna kan sorkar thlen chinah hian ‘theihtawp’ an chhuahin kan hria em? Tunah hian tlawm­ngai pawlte’n hlawh nei loa ruihhlo an dona hi chawlhsan ta se, kan sorkarin ruihhlo a do dan en hian hnehna chang turin kan beisei em? 

Kan sorkar hian theihtawp chhuahin ruihhlo hi a la do tawk lo niin a ngaih theih a, a chhan chu tlawmngai pawlte’n beihpui an thlak leh thlak loh kar a la hla hle tih a lang. Tlawmngai pawlte mahin heti khawpa an bei thei a nih chuan, Mizoram sorkar hian END leh police a neihte hmang hian tun aia chak zawkin ruihhlo do hna hi kalpui ngei rawh se. 

Sorkar thar a piang a, mipui pawhin beiseina sang tak nen an thlir mek a, ruihhlo laka hnehna chan hial beiseina nen minister pawh a phur hle. Kum nga chhung ringawt pawh hian theihtawpa an bei tak tak a nih chuan ruihhlo laka hnehna chan hi thil theih a ni ngei ang a, minister hian theihtawp chhuah tak tak turin a hote hi vil hneh se, kan ram min rûntu ruihhlo do tur hian bei tak tak teh ang u.