MHIP Day

July 6 hi Mizo Hmeichhe Insuihkhawm Pawl (MHIP) din champha a ni a, kum tinin sorkar chawlhah (holiday) puan a ni ṭhin. Kumina MHIP Day pawh Mizoram hmun hrang hrangah lawm a ni. 

MHIP Day hi tun hma deuh chuan sorkar chawlhah puan a ni ngai lo a, chuti chung chuan MHIP member-te chuan ṭha takin an lawm ṭhin. Tlem lai deuh aṭang khan sor­kar chawlhah puan a ni ta a, hei hian sawi a hlawh hle a, chutihlaiin tidanglam ngam an awm awm ta lo a ang ber. 

MHIP hi pawl zahawm tak a ni a, Mizo hmeichhia zawng zawng huap pawl a ni. Chutihlaiin nuho pawl anga sawi theih a nih chhan chu hmeichhe naupang an tel ngai lo a, nula pawh an tel meuh lo. Mizo zawng zawng huap pawl ni lem lo, hmeichhiaah pawh kum tam deuh chinte chiah telna pawl a ni a, an din champha phaka a state pumin chawlh lo puan ziah hi chu ennawn ngam ni se a ṭha khawp mai. 

Chutihlaiin MHIP member bikten he ni hi an lawm theihna atan restricted holiday-ah puan ni ta mai se, a pawla tel ve lote leh tel ve thei ngai reng reng lote pawh huapa hnathawh chawlh ni atana hman hi chu a inhmeh chiah lo. 

State hrang hrang chawlh neih dan enin Mizoram hi chawlh ngah pawl tak kan ni sa tawh a, MHIP Day-a a state puma chawlh puan hi chu ennawn leh theih ni se. MHIP lam pawhin huatah la loin zau taka thil thlir chungin, Mizoram state pum tana ṭha ber tur ngaihtuah ni se a lawmawm hle ang.