Ramri buaina

Tun hnai khan Vairengte leh Lailapur (Assam) inrinaah Assam Forest department-te'n in an sak avangin buaina tênau a chhuak. Assam sorkar a Forest department chuan Vairengte leh Lailapur inkara tun hmaa in an sak tawh chu an sak chhunzawm a, Forest guard-te'n silai nen an veng. He thil thleng hriat a nih hnuah hian Mizoram Police-te chuan in sakna hmun an pan a, Vairengte tualchhung mi tlem azawng an kal bawk. Assam Police-te a hmunah an kal ve bawk a, Kolasib leh Cachar district DC-te inbiak hnuah boruak hi a ziaawm chho ta a ni. 

Mizoram leh Assam hian ramri-ah buai­na tênau hi a khat tawkin kan nei reng a, a la tawp mai dawn lo niin a lang. Tuna Assam Forest department-in in an sakna hmun hi February 6, 1994-a Union Home Minister kaihhruaina hnuaia Mizoram Chief Minister leh Assam Chief Minister inbiaknaa an remtih anga state pahnihte'n kutthlak loh (status quo) ve ve tura February 15, 1994-a Chief Secretary ve vete'n an pawm huam chhunga mi a ni a, hetia Assam lamin inremna an bawhchhia hi a zialo hle a ni. 

Ramri buaina a thlen apiangin Assam hi a che hmasa an ni deuh zel a, keini hi chu a zawl dawh zawka ṭang kan ni ṭhin. Hei hi thil ṭha nge a nih ṭha lo zawk tih pawh ngun taka ngaihtuah a ngai a, Assam-in kan ramri an rawn kan tur vengtu ang lek kan ni palh ang tih a hlauhawm. 

Tin, ramri chung­changah hian sorkar hian ramri tia a pawm chin pawh a tihchian ngam a ngai a, a sawitu azira danglam mai mai ni lo, Mizoram sorkarin Assam nena ramri a tih hi mipui hriatah pawh a puan chian ngam a ngai. 

Tuna ramria buaina tênau chhuahna hmunte hi chu mi tam tak chuan Mizoram hmun chhung daih a nih thu an sawi thung a, a khawi chin hi nge Mizoram sorkarin 'kan ramri' a tih hi huaisen taka a kawh a ngai. Hetiang hi politics-a inbeihna hmanruaa hman a ṭha ber lo a, chutih rualin kan ram hruaitu politician-te hian kan ramri hi an chinfel ngam chu a hun tawh takzet a ni.