Sorkar thuchhuah dan hi

Tun hnaiah Council of Ministers an ṭhu khawm, an thu leh hla puanzar a ni lo. He Council of Ministers thuchhuak hi mipui hriat tura puangzar a nih hmain minister pathumin zirlai pawl hruaitute an sawipui a, he an inkawmna thu hi sorkarin Information & Public Relations department press release hmangin an puangzar thung. 

Mizoram mipuiten nghakhlel taka an lo thlir leh chan chu Council of Ministers ṭhukhawmte thu chhuak a ni a, an thil ngaihtuahte a pawimawh avangin an ngaichang lo thei lo. Ṭum dangah chuan Council of Ministers thu chhuak hi sorkar press release hmanga puanzar ṭhin a ni a, an thurel azirin press conference koa puanzar a nih changte pawh a lo awm tawh ṭhin. 

Tun ṭum thil thlenga sorkar chet dan hi a mak hle mai a, an thurel hi mipui hriata puanzarna mumal tak a awm lo a, media lam tan pawh hrilhhaithlak takin thu lakna tur mumal a awm lo. Sorkar thu chhuah awm chhun erawh chu zirlai pawl hnena Council of Ministers thurel an hrilhfiahna chuah a ni ta thung a, hei hi thil thleng ngai lo a nih loh pawhin thil thleng khat tak a ni. 

Sorkar hian ram pum nghawng thei thil a rel, a mipuite hriatah kalphung pangngai takin a puangzar hmasa tur ni awm tak a ni a; tun ṭumah hi chuan mipuiin an hriat hmain zirlai pawl an hriattir a, an sawihopui zet a, a sorkar thurel puan­zarna pawh ni chiah lo minister pathum leh zirlai pawlte inkawmna thu zawk chu sorkarin a puang­zar ta hlauh a ni. 

Zirlai pawlte hian sorkara lungawi lohna an neih hlauhthawn thuah minister zinga zirlai pawl hruaitu hluite hmathehin an inkawm tir hmasa zet a ni mai thei a, hei hi thil tihawm lo pawh a ni lo a; amaherawhchu sorkarin Council of Ministers thurel meuh puangzar si lo a, chu an thurelte zirlai pawl hnena an hrilhfiahna zawk an puangzar hlauh hi chu chin chhunzawm loh atan a ṭhat zawk hmel.