Sorkar sum enkawl dan

Congress party chuan thuchhuah siamin, minister of state pakhat thusawi aṭangin MNF sorkarin Demand for Grants-a tarlan loh sum hmanna tur, felfai tawk lo a tam hlea an ngaih thu an tarlang a; sum hman dan turah MNF sorkar chu mipui bum tumah an puh. 

Tun hnaia Mizo Hnam Runa a thusawi­naah minister pakhat chuan Assembly bud­get session chhungin Chief Minister-in Finance aṭangin Sports department tan cheng nuai 1,000 a pek belh thu leh Tourism deparment tan cheng nuai 100 a pek belh thu a sawi tih Congress thuchhuah chuan an tarlang. 

Congress thuchhuah emaw, Minister thusawi emaw, a khawi zawk zawk emaw hi thudik tawk lo ni hlauh se Mizoram tan chuan thil lawmawm tak a ni dawn a, minister hian CM aṭanga pawisa ṭhahnem tak mai an dâwn thu a sawi hi a dik a nih chuan kan ram sum leh pai enkawl dan hi a danglam hle tih a lang. 

Sorkar department hrang hrang­te sum hman theih zat, an hmanna tur leh a hman dan turte Assembly budget session-ah an pass ṭhin a, chu chu dan ang tluka ngaih a ni. Sorkar department-te'n an sum neih dan hre chungin hnathawh dan tur an duang ṭhin a, mipui pawhin department-te sum neih dante an thlir ve reng a, sorkar sum che vêl hi an ngaihven a ni. Nimahsela tuna a lan dan hi chuan chiang taka a hmanna tur ziah lan si loh, budget lama ziaka lang ve bawk si lo, CM-in a duh huna a pek chhuah theih sum a awm a nih hmel a, budget enkawl dan kal­phung thar a ni awm e. 

Sorkar hi a la kal ṭan dawn chauh a, an sum tihkual vel dan hi a ṭhat leh ṭhat loh teh theih la ni lo mah se, thil danglam tak chu a ni phawt mai. Hlemhletna leh sum hman dik lohna kawnga vengtu ṭha mamawhna a zual dawn tih erawh thil lang chiang sa a ni a - zirlai, politician, journalist, mithiamte leh mipui mimir pawhin budget-a fel taka ziah lan ni si loa hetianga sorkar sum tam tham che vel hi an ngaihven zui nasa ngei ang.