Ram neih dan

Tun hnai khan Land Revenue & Settlement minister hoin LR&S department officer te an ṭhukhawm a, minister chuan Revenue Act-te ennawn a siamṭhat ngai laite bawhzui mek a nih thu sawiin ram enkawlna chungchanga kalphung kan neih sorkarin dan a siam te zah thiam a ngaipawimawh turin a chah a. Land Acquisition Act pawh Mizo hnam zia leh nihphung mila dan siam a nih thu leh a hlawhtlinna tura hma lak mek a nih thu a sawi. 

Mizorama thil siam ṭhat ngai ber zinga pakhat chu kan ram neih theih dan hi a nih hmel a, Mizoram hi mi hausa leh a neinungte ram ang maiah a chhuak mek niin a lang. Thingtlang kilkhawr takah pawh an ram ṭha leh nuamlaite chu khawpui mi hausa in an lei zo deuh vek tawh a, Mizoram pum hi ni hausa tlem tein an insem ral titih chu a ni ta reng mai. 

Sorkar lama mi thiltithei deuhte hian khawpui pawna hmun awl remchang hi dan angin an ramah an rin lut zung zung a, ram humhalh tura ṭhahnemngai tura ngaih LR&S department lama hnathawktute hi a ram nei ngah ber berah an ṭang fo a, a buaithlak khawp mai. 

Ram inpek dan leh ram neih theih dan ber a fel miau loh avangin Mizorama mipui tam takin anmahni hminga 'ka ram', tih ve tur an neih loh laiin milian leh mi thiltithei deuhin kan ram ṭhalai hi chu an insem ral titih ta a ni ber. He mi kawngah hian kan ram hruaitute tal pawh hi fihlim ngam se a ṭhat tehlul nen ram neih belhna remchang a awmin an duh belh ve zel a, tuna kan MLA leh minister rual zingah hian enkawl zawh loh tur ram nei mi eng emaw zat an tel tlat a ni. 

Engpawhnise Mizorama kan ram neih dante hi ennawn a, tun aia fel zawka siam a ṭul. Hei hi kan kalpui dawn a nih tak tak chuan kan ram hruaitute leh LR&S department lama hnathawktute hi ṭan la hmasatuah ṭang ngam se a ṭha khawp ang.