District ramri

Biate Village Council leh Biate Welfare Society (BWS), Aizawl hruaitute chuan tun hnai khan chief minister a pisaah an kâwm a; Khawzawl district-a awm an duh thu leh an khuaah civil sub-division dah ni se an duh thu an thlen. 

Tun hnaiah khaw hrang hrang leh tlang dung khaw awm khawm hrang hrangin an district awm duhna bik an thlang mek a, a ṭhenin awm duh lohna an neih thu an thlen ve mek bawk. Tun hnaiah district thar pathum sorkarin tihpuitlin ngei tumin ṭan a la a, ramri a la tihchian loh avangin awm duhna leh duh lohna thlangin khaw tam takin thuneitute an dawr mek. 

Tunah hian district-a hna­thawktu tur sorkar hotu lu ber berte dah tumin sorkar a inbuatsaih ṭan tawh a, sorkar department ṭhenkhat hmun tur pawh an thlang mek. Heti chung hian district-in ramri an la nei fel lo a, kan hotuten an duhna lama an beh tur thu an lo sawi thawi bawk nen, district ramri rin fel hma aṭangin kan duhna lam kawkin khaw tam tak an buai mek. 

Sorkar hian district a tihpuitlin turah hian ruahmanna fel tak a nei ngei ang tih a chiang a, a district tur ber a fel tawh a, a ramri pawh an rin vek tawh hmel a. Khaw hrang hrangin awm duhna leh duh lohna an sawi mek karah hian, sorkar hian district ramri tura a ruahmanna neih hi puang fel tawh mai se a ṭhat hmel.