Sorkar thupek kai rual ṭhin se

Mizoram Pradesh Congress Committee chuan chu tun hnaia Vanapa Hall-a AMC-a an councillor tling tharte an lawmnaah MNF party chu Covid-19 inkaihhruaina bawhchhiaah an puh a; MNF-te chu an party hla saa an zai bakah social distancing an zawm lo a, mask an vuah lo bawk niin an sawi. 

Covid-19 avangin a ram pumin hun rei tak chhung in­kuahkhirhna hrang hrang hnuaiah kan awm a, chumi hnuah tlemin kan nun a zalen chho a, inkaihhruaina fel tak nen kan kal mek. Sorkarin kohhran inkhawm pawh a phalsak tawh a; nimahsela awmze nei takin ruahmanna a siam a, biak-ina a leng zat 50% chiah inkhawm a phal a, zai phal a la ni lo bawk a, inkhawm turte pawh mask vuah tur leh inkar hlat taka ṭhu turin ruahmanna fel tak a nei.

Hetihlaia Mizoram sorkarna vawnfung chelhtute ber hi Vanapa Hall-ah an lo zai mup mup a, mask vuah lo leh social distancing zawm loa an lo awm a nih tak tak chuan thil fel lo tak a ni a, dan ngai pawimawh ber tura ngaihte chet dan nia an puhna hi an inhmeh lo hle a ni. Hetihlai hian politics thila hian inpuhna satliah mai a awm thei a, Congress-in MNF an puhna hi thu dik a nih erawh chuan MNF hian thupha chawi se a ṭha hle ang.

Mizoram sorkar thuneitu lam pawh­in he thil hi thu dik a nih chuan ngai thutak se, ngaih bopui mai mai lo se a duhawm hle. Tlemlai deuh khan Sakawrdaia EFCI biak-ina in­khawmte pawh pawisa chawitir an lo ni tawh a, Pathian biaa inkhawmte pawisa chawitir ngam khawpa dan lekkawh duhtu sorkar tan chuan Vanapa Hall-a thil thleng nia puhna hi a dik a nih ngai chuan hremna lekkawh ngeina tur a nih hmel e.