Thlan bik neih

Hrangturzo bial chhunga khaw pangate chuan kum 2018 chhung khan serthlum an hralhna aṭangin nuai 260 vel an lei. Mimala hralh tam zualte'n cheng nuai 3-5 inkar vel an hralh tlangpui. 

Mizoram leilung hi thlai leh thei tan a ṭhat duh thu kan sawi ṭhin a, thiangtlang lo neite pawhin an loah thlai chi hrang hrang an chin pawlh ṭhin. Chhungkuain mahni ei khawp tur buh bakah thlai hrang hrang an thar chhuak thei a, kan ram lei­lung leh ruahtui tlak danin a zir bawka chhungkaw taima deuh chuan buh leh thlai chi hrang hrang an nei thei ṭhin. 

Tuna kan kalphungah hi chuan ei khawp, bar khawp kan thar hram hram a ni ber a, chhungkaw tam takin chu pawh chu an thar thei ta meuh lo. Kan kalphung pangngaia kan kal reng chuan kuthnathawktute harsatna hi belhchhahin a awm chho zel dawn ni maiin a lang a, sum an lakluh dan tur ngaihtuah a, innghahna tham sum hnar siamsak hi a pawimawh hle a ni. 

Sorkar aṭanga ṭanpuina sum sem ringawt hian a chhawk kumkhua dawn lo a, chuvangin awmze nei taka kal a hun tawh hle. Khaw ṭhen­­khat chuan sum chang thlai leh thei chin nachang an hre tawh a, a hlawma hralhin awmze nei thamin a kalpui theih tih a takin an tawng ta. 

Hetiang deuh hian khua leh bial khata chengte hian thlai leh thei thlan bik hi nei thiam se, thar chhuah a tam na na na chuan hralhna kawngah pawh thui tak a inpuih theih a, kuthnathawktute'n sum ṭhahnem zawk an lakluh theihna tura thei leh thlai chin tur thlan bik nachang kan hriat a hun ta.