Ramri buaia inpuhmawhna
Chief Minister kal chhuak ta Lal Thanhawla chuan Assam leh Mizoram inkar ramri velah tun thlenga buaina a chhuah leh ṭhin chhan chu ramri chingfel hmasa loin inremna (Memorandum of Settlement) ziah a nih vang niin a sawi.
Assam leh Mizoram state pahnihte inkar ramri inchuh lai mekah July ni 6 khan Assam Forest department chuan in sain an luah nghal a, hei hian state pahnihte inkara inremna lailawk, 'Ramri buai chhungah tu ve ve mahin kut thlak rih loh ni se,' tih chu bawhchhiaa ngaih a nih vangin, tunah hian buaina chhuak mai thei rengin boruak a inmun a ni.
Mizoram buai chingfel tura India sorkar leh MNF-ten inremna thu an ziah dawn lai vel khan, remna ziaktu turte kha a tawn tawnin an hmanhmawh hle a, remna tikhawtlai zawnga thu leh hla neih chu pawi sawina nasa tak a tling a nih kha. Ramin buai a tlin tawh loh vang a ni a, remna ziaktu turte pawh kha an hmanhmawh ve bawk. Ramri chungchang te, Chakma foreigner chungchangte pawh chinfel lohin remna ziah hnan a ni a, hengahte hian tun thlengin Mizoramin harsatna a tawk mek a, a la tawk zel dawn pawhin a lang. Chuvangin, ramri buai chhan chu MPCC president sawi angin a hun laia chingfel hmasa loa inremna ziah vang tih hi thu dik a ni.
Tun thlenga ramri buai chinfel a la nih loh chhanah hian, remna ziaktute chauh hi mawhphur pumhlumtua puh tur a ni lo ang, remna hnuaia ram roreltute pawh an insawi fihlim ngawt tur a ni lo. Inremna thuthlung kha kum 1986-a ziah a ni a, kum 33 lai a liam tawh. Hemi chhung hian MPCC president hi kum 20 chhung Mizoram chief minister a lo ni tawh a, inremna ziaktu pawl MNF president pawh kum 10 zet Mizoram chief minister a lo ni tawh bawk.
Ramri buai hi zirlaite emaw, forest department emawin an tihbuaia an chinfel tur a ni lo a, state-a thuneitu sang berte hi mawh phurtu, chingfeltu tur an ni. An mawhphurhna an ngaihsak tawk loh vangin ramri a buai reng a, zirlai pawl leh tlawmngai pawlte mangangin an thiam tawkin tha an thawh leh mai a ngai ṭhin zawk a ni.