Khuarel chhiatna

Tun hnaia ruahsur nasa vangin Mizoram hmun hrang hrangah chhiatna a thleng a, leimin leh tui lian vangin mi tam takin harsatna an tâwk a, in leh lo chan an awm bakah mahni ina awm ngam lo chhung­kaw eng emaw zat an awm. 

Kum tin maia Mizoramin harsatna kan tawh ṭhin chu fur ruahtui tla avanga chhiatna thleng ṭhin hi a ni. Fur a nat deuh kum a awm a, hetiang hun a lo thlen hian kan harsatna tawh hi a zual ṭhin a, kumin pawh chawl mang loa ruah a tlak rei avangin lei min leh tui lian avangin Mizoram hmun hrang hrangah har­sat­na a thleng mek a ni. 

Heng chhiatna leh harsatna thlengte hi 'khuarel chhiatna' kan ti mai ṭhin a, kan dan rual loh leh kan pumpelh theih loh thil vanga thleng niin a lang a; nimahsela heng thil thleng ṭhenkhat hi chu mihring fimkhur loh vangte leh kan inralrin loh avanga thlengte a ni thei. Miin chhiat an tawh laia, 'chumi khami vang' tia lo sawi zut zut hi thil mawi ni lo mah se, thil tam tak hi chu kan zirlai kan zir ṭhat loh vanga thleng a ni ṭhin. 

Kum tinin furah ruahtui a tam dawn a, tui luanna mumal lo, tuidawn awm ṭha lo te, hmun hlauhawm bika khuh hul ṭhat lohte leh chhan dang tam tak avangin leimin a thleng thei tih kan hria a. Mi ṭhenkhat vanduai bik awm bawk mah se, hmun ṭhenkhatah chuan kan fimkhur loh vangin harsatna kan tawk ṭhin. 

Tui liante hi chu dan ngaihna awm lo tluk a ni a, chutihlaiin kum tin mai tuilian avangin harsatna kan tawk a ni ta ber a, tui len ṭhinna hmunah kan awm a nih chuan hmun him zawk zawn te pawh kan zir chhoh zel a ṭul dawn niin a lang. 

Fur vanglai kan thleng tawh a, engtia rei nge ruah a tlak dawn kan hre lo a, tuna fimkhur chhuah thar pawh hi a la tlai lo ang. Khuarel chhiatna dan zawh loh thil a awm a, mihring fimkhur tawk loh vanga thleng chhiatna a awm thei bawk tih hre chungin, kum tin fur hmachhawn tur ka nih avangin fimkhur zawkin i hma chhawn tlang ang u.