IAS tan pawha it tham

Mizoram chief minister chuan, Mizoram sorkar flagship programme SEDP-ah mau ṭha chi chîn a ni dawn a, sorkar hnathawkte pawhin an duha ram an neih chuan an chíng thei dawn niin a sawi a; agriculture leh horticulture lama hmalak a nih hunah he lama thawktuten sum an lakluh tam dawn avangin nakin lawkah chuan IAS pawhin an hna bansana an luh chilh duh hial a rin thu a sawi. 

He thusawi hian ngaihtuah a tithui hle mai a, a sawitu hi kan state hotupa ber a ni a, a hna sawi hi India rama hna sang ber ang hiala chhal a ni bawk. Heti taka kan CM-in agriculture leh horticulture lam a ngai pawimawh a, mau/ rua hmanga sum lakluh a tum dan ngaihtuah hian thil a ti tak tak a, tihhlawhtlin pawh a tum hle ang tih a chiang a ni. 

Mizoram sorkar budget pharh tak kan en kha chuan agriculture lamah hian nasa takin sum dah tihtlem a ni a, sorkar kum hmasa nena khaikhin phei chuan a tlahniam nasa hle a, hetihlai hian horticulture lama hmasawnna tura sum dah erawh a pung thung. 

Engpawhnise kan CM thusawi aṭanga lang chu sorkarin tih tak takin, sum lakluh theihna turin mau leh rua kalpui a tum a, sorkar hnathawk tan pawh chin ve theih a ni dawn. Hemi piah lamah hian sorkar hnathawk sang ber berte pawhin an hna an kalsan duh phah hial khawp turin horticulture leh agriculture lamah hian sum kan thawk chhuak tam dawn a nih hmel. 

Kan CM ṭha­hnemngaihna leh tih takzetna hi a rinhlelhawm hauh lo a; nimahsela ram ṭha zawk, horticulture leh agriculture lama intodelha sum lalut tam zawk state-ah pawh tun thlenga IAS hna bansan duh khawp an la awm meuh lo a nih hmel si a, Mizoramah bul kan ṭan leih leih dawn chauh laia IAS hna bansanna tur khawpa hlawhtling tur chuan tun aṭanga tha thlah loa beih char char a ngai tawh ngei ang.