Category-I leh Chakmate

Supreme Court-a Mizoram sorkar zualkona thu, technical course zir tur thlannaa Chakma-te Category-I aṭanga paih tura a dilna chu Supreme Court chuan thu tling loah ngaiin a hnawl. 

Hetihlai hian tun hnaia Coun­cil of Ministers ṭhukhawm chuan The Mizoram (Selection of Candidates for Higher Technical Courses) Rules, 2016 chungchang a ngaihtuah a; Rules hnuaia Mizoram quota - Category-I a dil theite 'Indigenous people' tiha inziak chu 'Zo Ethnic' bak Mizoramah 'Indigenous people' an awm loh avangin 'Zo Ethnic' pual atan a dah a ni. 

Dan mit aṭanga thlir­tute chuan Chak­ma-te hi Mizoram leilung fa angin an pawm ta hmiah a ni ber a, Mizote chanvo ang apiang an chang ve zel thei tawh dawn tihna a ni. Kan sorkar hotu liante ṭhukhawmin tun hnaiah,  'Zo ethnic bak Mizoramah indigenous people an awm lo,' ti mah se, Supreme Court berin Mizoram sorkar zualkona a hnawl tak si-ah chuan, Mizoram quota-a technical course zir tur thlannaah an tling a nih phawt chuan Chakma-te pawh an tel ve thei dawn niin a lang. 

Tunah hi chuan mipuiin tih theih kan nei ta meuh lo a, sorkar hotute meuh pawhin tih theih an nei tam ta lo hle. Supreme Court-in kan zualkona a pawm dawn tawh si lo a, Chakma zingah technical course zir tur thlannaa tiṭha tak takte an awm nawk bawk nen, Mizote quota hi an luah ngei dawn a ang ta hle. 

A lemlam aṭanga thlir phei chuan, Chakma-te'n Category I lama Mizo­ram lei­lung fate quota an ei hêk hunah mipuiin an dem lutuk lohna turin, Council of Ministers ṭhukhawm hian anmahni lam inhungna turin an rel deuh chuk chuka puh maite pawh a awl rum rum ang. 

Engpawhnise Mizoram leilung fate quota la hêka Chakma-te'n technical course an zir hi Mizote chuan kan duh loin kan do ṭheuh a, nimahsela Supreme Court berin kan zualkona a hnawl ta si a, eng tin tak awm zel ang maw?