Zirtirtu transfer leh lak belh

Assembly session neih meka ziaka zawhna a chhannaah School Education minister chuan, December 2018 (MNF sorkar hnu) aṭanga January 2020 chhungin Aizawl khawpui chhungah hmun dang aṭangin sorkar sikula zirtirtu 109 sawn luh a nih tawh thu a tarlang. Zirtirtu Aizawla sawn luhte chu - primary school zirtirtu 53, middle school zirtirtu 41, high school zirtirtu 12 leh higher secondary school zirtirtu pathum an ni. 

Mizoram sorkar thar chuan zirna a ngaih pawimawh thu a sorkar ṭan tirh aṭangin a sawi ri fo a, chumi tidik tur chuan zirtirtu ṭhahnem tak a la thar bawk. Thingtlang lamah a khaw mi ngei an thawh theihna turin ruahmanna an siam a, mipui pawh an lawm viau laiin a rûk a râlin mipui nawlpui hriat lohin advertisement chhuah miah loin School Education hnuaia thawk tur mi 91 zet lak a lo ni reng tih RTI Act hmanga zawhna an chhannaah a lang. 

Sorkar thar a ni a, zirtirtu a hlawma lak turah fair taka kalpui turin a lo insawi ba nasa tawh si a, chuvangin advertisement chhuah loin an duhsak zawngte lakna remchang an lo insiam ve pawh a ni thei a, thil dik lo tak ni mah se Mizorama thil thleng ngai lo a ni lem lo. Chutihlaiin tun hnaiah kum khat vel chhung leka zirtirtu 100 chuang zet mai khawpuia an lo la lut hi chu hriatthiam a harsa ta khawp mai. 

Thingtlanga zirtirtu indaih loh kan buaipui a, sorkar ngei pawhin chu chu ngai pawhin sum awm lo chung chungin zirtirtu thar a hlawmin a la a (a ṭhen advertisemnt chhuah lohin a la a), chutihlaia thingtlanga zirtirtu awm sa 209 ngawt Aizawl khawpui chhung zirtirtu indaih em em tawhna hmuna a sawn lut hian zirna siam ṭhat a tum tak tak lo tih a lantir thei hial ang. 

Zirna siam ṭhat tum a, thing­tlanga zirtirtu indaihlohna phuhruk tura zirtirtu thar lak belh na na na, a awm sa khawpuia sawn lut leh bawk si hi chu thil inkalh tlat a ni. 'Thingtlanga thawk tura zirtirtu lak belh kha Aizawl khawpui-a awm tura zirtirtu 100 rual transfer hian a thai chhe fai vek,' tiin an puh mai ang tih hlauhawm tak a ni.