Assam Rifles chhuah hun tur

MNF president leh Mizo­ram chief minister ni bawk Zoramthanga chuan Aizawl Municipal Corporation (AMC) campaign-naah Aizawl khawpui lailia cheng mek February, 2021 chhunga Assam Rifles-te Zokhawsang lama insawn chhuak tura an nawr thu a sawi a, Mizoram hmun danga sipaite pawh um chhuah zel an tum thu a sawi bawk. Tun hnaiah Assam Rifles hotupa chuan Zokhawsanga an insawn hun tur a sawi theih loh thu leh Ministry of Home Affairs aṭanga thu an la hmuh loh thu a sawi.

Aizawl khawpuia Assam Rifles awmte hi a hnawk kan titlang a, khawpui daia sawn chhuak turin hun rei tak aṭangin ruahmanna a kal tawh. Mizorama roreltu Congress an nihlai pawhin Assam Rifles sawn chhuak tura hmalakna hi kalpui a ni a, eng emaw zat chu Zokhawsang lamah an insawn chhuak tawh nghe nghe. MNF an sorkar hnuah an insawn chhuak ngei dawn tih kum 2019 daih tawh khan Chief Minister-in Lammuala Chapchar Kût lawmnaah a lo sawi tawh bawk a, tun thlengin an la chhuak lo thung.

Mizoram sorkar tan Assam Rifles-te hi a nawra nawr chhuah theih chu ni se Zokhawsang lamah an pem tawh ngei ang a; nimahsela anni hi state sorkar tana nawr chhuah chi niin an lang lo a, sorkar laipuia MHA lamin insawn tura an tih hunah an insawn mai dawn niin a lang. Hei vang hian mipui hriat tura AR nawr chhuak tura anga insawite hi tih tawh loh ni se, insawn chhuak thuai se tih hi chu Mizo zawng zawng duhthusam a nih avangin sorkar laipui lamah lo nawr reng zawk se a ṭha hle ang. 

Assam Rifles-te hian chhuah hun an la nei dawn tih a chiang a; an chenna tur ram kan pe tawh a, an chenna tur in saksak an nih tawh bakah an mamawh kawng, eng leh tui pawh pek an ni tawh a, eng tikah emaw chuan MHA thupek angin an la insawn chhuak ngei ang.