Mizoram mamawh ram sem rual

Land Revenue and Survey Board chu tun hnai khan chief minister Zoramthanga hoin an ṭhukhawm a, CM chuan, SEDP hnuaiah leilunga innghat eizawnna (land-based economic activity) ngêlnghet leh hlâwk zawka kalpuina turin land survey leh record mumal tak neih a ṭul avangin, Land Revenue and Survey Board-in mawhphurhna hautak leh pawimawh tak an nei tih a sawi. 

He meeting-a an thil sawiho zingah SEDP hnuaia mau emaw, ṭhelrêt emaw, thil dang emaw chìnna tur ramte rualkhai taka sem a nih theih dan tur te, thawk ṭha duh lo an awma chhuhsak dan turte leh, ram sem sa mi dang hnena hralh chhâwn a nih lohna tura rua­hmanna siam chungchangte a tel. 

Mizoramin kan mamawh lian tak pakhat chu kan ram neih chhunte sem rual hi a ni. Tuah hi chuan kan ram ṭhalai zawng zawng deuhthaw hi mihausate hian an insem zo tawh a ni ber. Thingtlang kilkhawr thlengin a hmun rem leh thlai chinna tura ṭha deuh te, mihring khawsakna atana hmun rem bikte leh hmun nuamte chu a khaw chhunga cheng a neinung deuhten an lei loh pawhin khawpuia mi hausain an lei zo deuh vek tawh a ni.

Tunah hi chuan eng thil pawh kalpui dawn ila 'ral awl' han tih mai tur hi a vâng ta hle. Thingtlang khaw tam takah chuan lo neihna tur ram pawh a tlem sawt hle a, mimal ram a ni ta deuh zel. Ram neih theih zatah bituk a awm lo a, mihausa leh miliante'n an duh zat zat an valh a, sorkar hotu liante leh tuna kan MLA leh minister-te ngei ngei pawh mahni enkawl zawh loh ram nei an awm fur. 

SEDP a hlawhtlin theihna tur leh, CM ngaih pawimawh raw/ mau chin kalpui tur chuan miin ram a neih phawt a ngai; ram sem rual a nih si loh chuan SEDP pawh hi a nei sate pek belhchhahna a chang palh thei a, Mizoramin a mamawh chu ram sem rual hi a ni.