Hnathawktu lak dan
School Education department-in primary school leh middle school zirtirtu 881 a lak tur chu written exam awm loin, personal interview hmanga lak tur a ni. Hetih lai hian, School Education department hian Grade-IV tur eng emaw zat an la dawn bawk a, chutah chuan written exam a awm dawn thung.
Tun hnaia Mizoram sorkarin zirtirtu lak a tum hian sawi a hlawh hle mai a, a chhan lian tak chu zirtirtu lak dan kalphung awm sa zawm loa kal a tum vang a ni ber ang. MPSC kal tlang loa lak tum an nih bakah zirtirtu ni turin an paltlang ngei ngei ngai MTET paltlang lote pawhin an dil theih turin he hna lak dan hi her rem a ni. Chutihlaiin School Education minister leh thuneitu dangte pawhin sorkarin dik takin a tling ngeite lak a tum thu an sawi fo tawh bawk.
Ngaihtuah tithui tak erawh chu School Education department hnuaiah hian tun hnaiah hna chi hnih lak a ni dawn a, pakhat chu lehkha thiam chinte dil tur a ni a, pakhat chu lehkha thiam sang lote pawhin an dil theih a ni. Kan naupangte kaihruai a, kan zirlaite zirtirtu tur laknaah written test a tel dawn lo a, chutihlaiin Grade-IV hnathawktu an lak tur pawl 8 pass chin dil theihah chuan written test a awm dawn.
Hna lak dan hi a thuhmun lo a nih a, written test neih tel a ngai dawn a nih chuan zirtirtu laknaah hian a inhmeh zawk tehlul nen, pawl 8 pass chin dil theihah written test a awm ta zawk daih a, thil theih loh ni lo mah se thil inhmeh ber a ni chiah lo. Engpawhnise Mizoram sorkar hnuaia hnathawktu tur lak dan hi tun hma aṭangin a fel lo nasa tawh a, vawi leh khata chinfel theih a ni kher lo ang a, a tibuai behchhah zawnga kal loh hi chu a ṭha ngawt mai.