Mizo kawng siam

PWD chuan tun hnai khan an hnathawh thlir lêtna hun an hmang a. He hun hmanpuitu, PWD changtu chief minister chuan, kawng siam hna Mizo ngeiin an thawh theihna atan ṭan lak an tum thu a sawi. 

Mizorama kan kawng siam hna tam zawk hi chu hnam dangte thawh a ni a, hna lian tham thawk thei contractor lian kan neih meuh loh avangin kan rama hnate hi hnam dangin an thawh a ngai ṭhin. Hei vang hian har­satna tam tak kan tawk a, state pawn aṭanga hnathawk tura lo lutte hian kan ram chinchang an hriat tawk loh avangin hna an thawk chak hleithei lo a, sum a tam dan ngaihtuaha hna ṭha lo taka thawh chang an nei. 

Mizo contractor-te ngei hi hna lian thawk thei tur awm thei se, anni hian ram hmangaihna nen hna han thawk tak tak se, hnam dangte khum zawkin hna hi thawk thei se tih hi duhthusam a ni. Hetihlai hian kan contractor-ten hna lian an thawh ve theihna tura, "Cheng vbc. 10 vel budget-ah dah a, hei hi Mizo contractor-te'n hmanraw leina atana loan an lâka interest rulhsak emaw, rulh ṭhensakte rilruah a awm," tia CM thusawi hi chu ama sawi ang ngei hian uluk taka ngaihtuah chi a nih hmel. 

Hna lian thawk tura kan duh luata sorkar aṭanga a contractor-te zawk hamṭhatna siam chiam mai hi khuareiah a fuh loh palh a hlauhawm a, kan contractor liante hi hna lian zawk thawk thei turin theihtawp chhuahin an theihna zawnah ṭang ta zawk se a fuh hmel. 

Sorkar kalphung pangngai a awm a, contractor-te nih­phung pangngai a awm bawk. Chumi bawhchhiaa hna lian zawk an thawh theih dan zawn ngawr ngawr hian rah ṭha lo a hring chhuak palh thei a, "Contractor tute nge siam len an tum?" tihte thleng hian Mizo mipui­ten chik takin an lo thlir ang. 

CM-in ram hmasawnna tur leh kan ram tana hamṭhatna tura ngaihtuahna a seng ṭhin hi a fakawm a, kawngpui siam thei tura Mizo contractor thlan tum dan leh contract hna lian thawk thei tura ruahmanna siam turah hian ngun lehzualin ngaihtuahna seng se a duhawm.