Covid-19 hri leng dona

Mizoram police leh hmun hrang hranga local/ village task force-te chuan May 4, 2020 aṭanga February 24, 2021 chhung khan The Mizoram (Containment and Prevention of Covid-19) Ordinance/Act, 2020 bawhchhia mi 75,945 an man tawh a, chu'ng mite pawisa chawi tling khawm chu Rs. 1,52,50,600 a ni. 

Covid-19 hri a darh lohna tura sorkarin inkaihhruaina a siam zawm lo mi he ti zat man tur an awm hi a zialo hle mai a, chutihlaiin mi heti zat man tur khawpa kan police-te leh task force lam an thawkrim hi an fakawm. Hri a len miau avangin mipui nawlpui kan inven a ngai a, mahnia inven nachang hria an awm a, fimkhur nachang hre lo leh ṭul ti lem lo thlengin an awm a, hei vang hian a vena ven hi thil ṭul tak a ni reng a ni.

Tunah hian mi tam tak chuan kan ramah Covid-19 hri hi a leng tawh mang loin an hre mai thei a; nimahsela a nihna tak kan chhut chuan kan hlauh vanglai ai khan he hri hi kan ramah a darh nasa tawh niin a lang. Tun hnaia hri vei an hmuh chhuahte hi natna dang avanga damdawiina inentir leh sikul naupang hostel-a lut turte an ni ta deuh ber a, a hri kaina pawh hriat mang loh a ni hlawm. 

He hri hi Mizote hian kan haw vak loin kan tan a hlauhawm ve vak lo ang maia sawi pawh a awl a, a thihpui an tlem bakah nat phah zui miah lo hi a tam zawk an ni a; nimahsela a vanduai ṭhenkhatin an thihpui bakah khawvel hmun dang­ah a nuai biin mihring nunna a la bawk si a, zuam ngawt chi chu a ni hauh lo ang. 

Engpawhnise sorkarin hri leng avanga inkaih­hruaina leh in­khuahkhirna a la kalpui mekte hi ṭha taka kenkawh ni se, khawlaia hmaituamna hmang tura inzirtirna pawh chhunzawm zel ni se, mipui hrek lutuk si lo hian fimkhur takin hri dona hi kalpui zel theih a ni ang.