Ruihhlo simte hmalam hun

Central YMA hnuaia ruihhlo do pawl, Supply Reduction Service (SRS) batch pakuanain ruihhlo an mante hal ral paha thusawitu, Mizoram chief chuan, ruihhlo ngai sim tawhte chu eizawnna ṭha tak sorkarin siamsak a tum thu a sawi. 

Mizorama kan harsatna tawh lian tak pakhat chu kan ṭhalaite ruihhloin a tibuai nasa ta lutuk hi a ni. Ṭhalai ni si, an taksa chak vanglai tak turah hnathawk hleithei loin an awm a, ruih tur zawng reng rengin an buai a, anmahni pawh in­­thunun hleithei lo khawpin ruihhlo vangin an talbuai a ni. 

Ruihhlo ngaite enkawlna hi Mizoram hmun hrang hrangah a awm a, NGO-in an din te, khawtlang ṭangrualin an din te, kohhran lamin an siamte leh sorkarin a dinte a awm. Ruihhlo ngai ṭhahnem tak hi 'enkawl dam' angin an chhuak tawh a, dam hlen an awmlaiin eng emaw zat chu an buaina ngaiah bawk an buai zui leh ṭhin. 

Ruihhlo simten an sim hleih­theih loh chhan lian tak pakhat chu tih tur an nei lo a, hun awl an ngah lutuk ṭhin hi a ni. Zep thu a cheng lo a, ruihhlo lo ti tawh na na na chuan tha an lo nei lo deuh a, tharum ngai deuh hna hi an thawk peih vak tawh lo. Thiam thil dangte an neih si loh chuan ei zawng loin an tei rawlai leh a, hun awl an ngah bawk nen an buaina ngaiah bawk an buai leh ṭhin. 

Ruihhlo ngai sim tawhte tana eizawnna ṭha tak sorkarin ngaih­­tuah a tum hi thil lawm­awm tak a ni a, ruihhlo ngai enkawlna hmuna thawktute tan pawh chanchin lawmawm danglam bik a ni ngei ang. Chutihlaiin ruihhlo ngai pawh ni lo, Mizo ṭhalai lehkhathiam tak takte tana eizawnna ṭha siamsak chu sawi loh, an eizawnna tur kawng kawhhmuh pawh sorkar hian a la harsat si a, ruihhlo ngai simte eizawnna a siamsak dawn chuan sorkar hi a thawhrim zual a ngai dawn hle mai.