Ramri chinfel tum dan chi hnih

Mizoram chief minister chuan tun hnaia Mizo Hnam Rûna inkhawmah thu a sawi a; ramri buai chu a chinfel dan tur strategy felfai tak an nei a, mahse, puanzar mai chi a ni lo tih sawiin, "Ramri hi a sawia sawi fel chi a ni lo a, a tiha tihfel chi a ni," a ti. 

Tun hnaiah bawk Home minister chuan ramri buai chu tharum hmanga chinfel chi a nih loh thu a sawi tawh a, all party, all NGO-te nen thu khat vuaa kal a ṭul thu leh ramri chu Mizo leh Mizo inbeihna hmanruaa hman ṭha a tih loh thu a sawi. 

Ramri buai hi kan sawi nasa ta hle mai a, kan ṭhenawm state nen hian 'ramri' tia kan pawm chin a inan loh vang a ni. MNF leh India inremnaa Mizoram ramri nia ziah hnan leh tun hnaia Mizoram sorkarin ramria a pawm thar tak pawh a inang lo a, ramri chinfel hi thil huphurhawm tak a ni. 

Hei vang hi a ni mai thei, Mizoram Home minister chuan ramri chu tharum hmanga chinfel chi a nih loh thu a sawi bakah Mizo zawng zawngin inlungrual taka ke pen a ṭul thu a sawi a, sorkarna siam tawhten an hunlai ṭheuha ramri buai chinfelah harsatna an tawh vek thu a sawi. 

Chief Minister ve thung chuan ramri chinfel dan ṭha tak a hriat thu a sawi rualin chu chu tuna puanzar chi a la ni lo tih a sawi a; ramri chingfel turin 'a tiha tih' a ṭul thu a sawi tel bawk avangin CM thil hriat hi hriat chian a chak­awm tawlh tawlh mai. 

Engpawhnise tun hnaiah kan ram hruaitu pawimawh pahnihin ramri chinfel dan tur an sawi tawh a, an thusawi ki a inang lo hle. A pawimawh ber chu ramri buai kan neih chinfel a, a dawih zawk leh a tawlh zawka kan ṭan zel tawh loh a, kan ram chin kan humhalh hi a ni.