MPSC versus Sorkar

Mizoram Public Service Commission (MPSC)-in Mizoram sorkara thawk tur group B (non gazetted) post lak hna a buaipui laklawhte chu MPSC-in an khawih chhunzawm tur thu chief minister chuan a sawi. MPSC hna lak kal mek titawp tura sorkarin a tih loh thu leh, MPSC-in an hna lak kal mek interview neih tur an tihtawp chu sorkarin a hriatpui loh thu a sawi.

Hetih lai hian, MPSC chairman chuan, sorkar thu an zah avangin sorkar hna group B (non gazetted) lâk a tihtawp thu a sawi a; sorkarin MPSC khawih tur a nih tawh lohna notification tihchhuah a nih tawh avangin khawih chhunzawm thei an ni tawh lo tih a sawi a, "Kei ni tan chuan lo khawih luih zel chu sorkar thupek pawisak lohnate pawh a ni thei. Order kan hmuh reng laia hna lo lak chhunzawm zel chu a inthlahrunawm a ni," a ti.

CM thusawi aṭanga a lan danin sorkar hian MPSC hna lak kal mek hi tihbuai an tum lo a, MPSC lamin written exam a buatsaih tawh, personal interview chiah la hmabakte kal tlangtir an rem tih bakah exam tura form fill-up tawh zawng zawngte pawh MPSC-in an buaipui zui dawn a ni.

Hetihlai hian sorkarin June 21-a notification a chhuahah chuan sorkara thawk tur group B (non gazetted) post leh a hnuai lam chu MPSC-in buaipui tawh dawn lo, tih a inziak a; nimahsela MPSC chairman sawi danin he notification hi MPSC-in a copy an la dawng lo niawm tak a ni. Sorkarin Mizoram Subordinate Services Selection Board (MSSSB) din tur thu an rel tawh a, group B (non gazetted) leh a hnuai lam hi chu MSSSB-in an khawih tawh ang.

He thila lang chiang tak chu Mizoram sorkar hian MPSC hi a ngaihsak tawk loin an thuchhuah copy pawh an pe lo a, chutihlaiin MPSC-in sorkar thuchhuah an hmuh zulzuia hna lak kallai an tihtawp avanga sawiselna chu ngaingam loin MPSC chu hnathawk chhunzawm turin an ti niin a lang. Hei lah hi zirlai pawlten CM an kawmnaa a sawi tih zawng hi mipui hriat dan chu a la ni. Mizoram sorkar leh MPSC inkar hi chinfel a ngai tih chu tlang hriat a ni ta e.