Rorelna in sangah kuhva rah sumdawnna

Myanmar aṭanga kuhva rah lo lut Mizoram kal tlanga phurh a nih chungchang chu Assembly budget session neih mekah sawi chhuah a ni a, Home minister chuan Mizoram kal tlanga kuhva rah phurh chu titawp turin sorkarin hma a lâk mêk thu a sawi. 

Kuhva rah sum­dawnna hian nasa takin Mizoram a nghawng tih chu kan rorelna in sanga an thusawi aṭang pawhin a hriat theih a, he sumdawnnaa tel ve leh a hlawkna teltu zat hi hriat ni lo mah se a pawisa che vêl a tam tham avangin a nghawng pawh a na hle ang tih a chiang a ni.

Kuhva rah sumdawnnaa thil tihfel ngai tak chu dan loa sumdawnna a ni tih hre chunga kan hre lo der rei lutuk hi a ni a, dan pawnah kan hnawl ngam lo a ni deuh ber zawk. Dan chhunga mi ni tak tak si loin dan anga a kal theih dan kawng kan phuahchawp a, a taka kalpui dawnin dan hmaah bawk thil a buai leh ta si a ang ber. 

Engpawhnise he thilin a ken tel chu sumdawnna lian tham tak, mipui mimir pawhin rinhlelhna nena kan thlir, sorkar tha chakna hmang pawha an titawp hleithei lo hi a ni a. Lirtheiah pawh a lian ber chia muangchanga an phurh luh dang thei loa state pakhat ve riang ruang kan awm hi thil mak tak a ni. Ṭiau lui kanna kawng an inlaih chawpte pawh kan veng hneh lo a, Champhai aṭanga Aizawl panna kawngpui pakhat chiah a awm chung pawha Silchar kawnga ven kan tum chauh mai pawh hi thil mak tak a ni tawh. 

Kuhva raha sumdawnna kal vel dan leh tihtawp tuma ven kan tum dan hi chuan mipui rilru a tibuai chhunzawm zel dâwn a nih hmel.