Zirtirtu transfer & posting

School Education minister chuan, zirtirtu sawn kual (transfer & posting) tih a nih dawnin, an thawh mekna bialtu MLA-te remtihna a ngai dawn tih a sawi. 

Mizorama kan harsatna lian tak pakhat chu sorkarin a hnathawk zirtirtute a duhna hmuna a dah thei lo hi a ni. Sorkar sikulah hian zirtirtu an indaih lo hi harsatna ni bawk mah se, chu aia har­satna thuk zawk chu sorkarin a dahna hmuna zirtirtu an kal duh lo ṭhin hi a ni. 

Hmun ṭhenkhat, a bikin khawpui hmun nuam deuha sorkar sikulah zirlaiin an mamawh aia tam zirtirtu an nei a, chutihlaiin thingtlang hmun kilkhawr zawkah zirtirtu an indaih lo a, an buai ṭhin hle. 

Hetia mawl taka thlir pawh hian sorkar ve riang ruang chuan a hnuaia hnathawktu, a hnen aṭanga thla tin hlawh la ṭhin zirtirtu chu a mamawhna hmunah a dah thei tur a ni a; nimahsela tun thleng hian zir­tirtute hi sorkarin a mamawhna hmunah a la sawn hleithei lo. 

Chhuanlam hrang hrang avang te, sawi­puitu neih ṭhat avangte leh chhan dang avangin a hmun nuam apiangah zir­tirtu an tam a, ma­mawh­na a sanna hmun kilkhawr lamah zirtirtu an indaih lo mek a ni. He harsatna chingfel thei sorkar hi Mizoram hian a la nei lo a ni ber a, School Education minister thar hian zirtirtute hi mamawhna hmunah sawn turin ṭan la se, chu chu zirna tihhmasawnna tura kawng pawimawh tak a ni si a.